काठमाडौं । नेकपा (एमाले) को केन्द्रीय अनुशासन आयोग र लेखा आयोगको नेतृत्व सर्वसम्मत चयन भएको छ । सोमबार मनोनयन दर्ताका क्रममा एकल उम्मेदवारी परेपछि दुवै आयोगका अध्यक्ष निर्विरोध भएका हुन् ।

केन्द्रीय अनुशासन आयोगको अध्यक्षमा प्राडा भरतराज पहारी निर्विरोध निर्वाचित भए । सोही आयोगको उपाध्यक्षमा चक्रबहादुर पराजुली र सचिवमा डा. राजेन्द्र घिमिरे पनि निर्विरोध चयन भएका छन् ।

त्यस्तै, केन्द्रीय लेखा आयोगको अध्यक्षमा डा. पुष्पराज कँडेल निर्विरोध निर्वाचित भएका छन् । उनको पनि एकल उम्मेदवारी परेको केन्द्रीय निर्वाचन आयोगले जनाएको छ ।

आयोगका पदाधिकारी निर्विरोध भए पनि सदस्यमा भने चुनाव हुने देखिएको छ । अनुशासन आयोगका २२ जना सदस्य पदका लागि ३२ जनाको उम्मेदवारी परेको छ ।