बागलुङ । बागलुङमा पिकअप जिपको ठक्करबाट एक बालकको मृत्यु भएको छ। म्याग्दीको सदरमुकाम बेनीबाट बागलुङतर्फ आउँदै गरेको जिपले ठक्कर दिँदा काठेखोला गाउँपालिका–१ धैरेनीका ५ वर्षीय सूर्य ढुंगानाको ज्यान गएको हो।

जिल्ला प्रहरी कार्यालयका अनुसार ध १ च १३३६ नम्बरको पिकअप जिपले बिहीबार साँझ ६ बजेतिर बालकलाई ठक्कर दिएको थियो। सडक पार गर्ने क्रममा जिपले ठक्कर दिएको प्रहरी निरीक्षक कमलजंग थापाले जानकारी दिए।

दुर्घटनामा गम्भीर घाइते भएका बालकलाई उपचारका लागि तत्काल धवलागिरि प्रादेशिक अस्पताल लगिएको थियो। तर, चिकित्सकले उनलाई मृत घोषणा गरेको निरीक्षक थापाले बताए।

प्रहरीले जिप चालक पर्वतको जलजला गाउँपालिका–८ नाङ्लिबाङका २५ वर्षीय सुनिल नेपालीलाई नियन्त्रणमा लिएको छ।