पोखरा । स्याङ्जाको अर्जुनचौपारी गाउँपालिकामा शनिबार सम्पन्न विशेषज्ञसहितको बृहत् स्वास्थ्य शिविरमा ६ सय ३१ जना स्थानीयले स्वास्थ्य सेवा लिएका छन् । खुमा अर्याल फाउन्डेसन स्याङ्जा र अर्जुनचौपारी गाउँपालिकाको संयुक्त आयोजना एवम् गण्डकी मेडिकल कलेज पोखराको प्राविधिक सहयोगमा उक्त शिविर भएको हो ।

अर्जुनचौपारी गाउँपालिका–१ स्थित गाउँकार्यपालिकाको कार्यालयमा सञ्चालित शिविरमा परीक्षण गराएकामध्ये १ सय २० जना बिरामीलाई थप उपचारका लागि गण्डकी मेडिकल कलेज पोखरामा रिफर गरिएको छ । रिफर गरिएका बिरामीहरूलाई गण्डकी मेडिकल कलेजमा औषधिमा ५ प्रतिशत र उपचार शुल्कमा २० प्रतिशत छुट दिइने आयोजकले जनाएको छ ।

शिविरमा हाडजोर्नी तथा नशारोग, मुटुरोग, आँखा, नाक, कान तथा घाँटी रोग, स्त्री तथा प्रसुति रोग, बालरोग, दन्तरोग र छालारोग परीक्षण सेवा उपलब्ध गराइएको थियो । रेडियोलोजी, जनरल मेडिसिन, इसिजी र इको सेवा पनि शिविरमा प्रदान गरिएको थियो । स्वास्थ्य शिविरमा विशेषज्ञ डाक्टरहरू कृष्ण विष्ट, चन्द्रबहादुर पुन, बृहस्पति सिग्देल, अपार अधिकारी, विनिता शर्मा, स्मारिका आचार्य, बृजकुमार यादव, सान्त्वना पराजुली, अर्जुनकुमार खत्रीलगायतका चिकित्सकहरूले बिरामीको स्वास्थ्य परीक्षण गरेका थिए ।

शिविरमा सेवा लिनेहरूमध्ये सबैभन्दा धेरै आँखा, नाक, कान, घाँटी रोग र हाडजोर्नी तथा नशारोगका बिरामी रहेका छन् । तथ्यांकअनुसार १ सय ९० जनाले आँखा, नाक, कान, घाँटी र १ सय ९० जनाले नै हाडजोर्नी तथा नशारोगको परीक्षण गराए । त्यस्तै, १ सय २६ जनाले रेडियोलोजी सेवा, १ सय २२ जनाले जनरल मेडिसिन सेवा, १ सय १५ जनाले इसिजी र ९० जनाले इको सेवा लिएका छन् । ५५ जनाले मुटुरोग, ४६ जनाले स्त्री तथा प्रसुति रोग, ३८ जनाले दन्तरोग, ३५ जनाले छालारोग र ३२ जनाले बालरोग सम्बन्धी परीक्षण गराएको आयोजकले जनाएको छ ।

कार्यक्रममा अर्जुनचौपारी गाउँपालिकाका अध्यक्ष प्रकाश तिवारीले दूरदराजको पालिकामा आएर विशेषज्ञसहितको स्वास्थ्य सेवा उपलब्ध गराएकोमा खुमा अर्याल फाउन्डेसनलाई धन्यवाद दिए । गाउँपालिकाका उपाध्यक्ष सपना गुरुङ, वरिष्ठ उद्यमी तथा समाजसेवी खुमाप्रसाद अर्याल लगायतले शुभकामना मन्तव्य राखेका थिए । कार्यक्रममा संस्थापक परिवार सदस्य डा. लुना अर्यालले शिविरमा उपलब्ध सेवाहरूको बारेमा जानकारी गराएकी थिइन् ।

फाउन्डेसनका अध्यक्ष लेखनाथ शर्माले सबैको साथ र सहयोगले गर्दा नै शिविर गुणस्तरीय सेवासहित सम्पन्न भएको बताए । सो क्रममा फाउन्डेसन र गाउँपालिकाको तर्फबाट गण्डकी मेडिकल कलेजलाई सम्मानपत्रद्वारा सम्मानित गरिएको थियो । फाउन्डेसनद्वारा गाउँपालिकालाई र गाउँपालिकाद्वारा फाउन्डेसनलाई सम्मानपत्रले सम्मान गरिएको थियो ।

गण्डकी मेडिकल कलेज पोखराको टिमलाई प्रशंसापत्र प्रदान गरिएको थियो । फाउन्डेसनका अध्यक्ष लेखनाथ शर्माको अध्यक्षतामा सम्पन्न कार्यक्रममा अर्जुनचौपारी गाउँपालिका–१ का वडाध्यक्ष रणबहादुर थापाले स्वागत र सचिव ध्रुव शर्माले कार्यक्रम सञ्चालन गरेका थिए ।