पोखरा ।
कास्कीको माझठाना गाउँबाट पोखरा समाजको नवौँ वार्षिक साधारण सभामा ९ जना प्रतिभालाई सम्मान गरिएको छ । माझठानामा जन्म भई पोखरामा विभिन्न पेसा व्यवसायमा संलग्नहरूको साझा संस्थामा आबद्ध सदस्यहरूका प्रतिभावान छोराछोरीलाई सम्मान गरिएको हो ।

कार्यक्रममा डा. अपार लामिछाने, डा. पूजन लामिछाने, डा. विजय बास्तोला, डा. विमला तिवारी, डा. नरेन्द्र लामिछाने, चार्टर्ड एकाउन्टेन्टद्वय दीपक भुर्तेल र सागर लामिछाने, सिइओ हरिबहादुर बुढाथोकी र इन्जिनियर निरोज लामिछानेलाई सम्मानपत्रले सम्मान गरिएको हो ।

समाजका सल्लाहकार तोयनाथ लामिछानेले कार्यक्रमको उद्घाटन एवं प्रतिभालाई सम्मान गर्दै माझठानाबाट पोखरामा विभिन्न क्षेत्रमा स्थापित हुँदै समाजको पहिचान उजागर गर्न सफल समाजको योगदान प्रशंसनीय रहेको बताए ।

सल्लाहकार एवं सञ्चारकर्मी हरिप्रसाद बास्तोलाले माझठाना जन्मभूमि र पोखरालाई कर्मभूमि बनाउँदै आएकाहरूको साझा संस्था समाजले सबैलाई एकै थलोमा जोड्न सफल भएको बताए । सम्मानित व्यक्तित्व वीर अस्पतालका वरिष्ठ चिकित्सक अपार लामिछानेले समाजका शिक्षा र स्वास्थ्य क्षेत्रका प्रतिभाको पहिचान गरी माझठानाको विकास निर्माण र सामाजिक सेवामा उपयोग गरिनुपर्ने बताए ।

समाजले जटिल रोगबाट पीडित माझठानाका नन्द तिवारीलाई एक लाख ३२ हजार र रतन परियारलाई ६० हजार ४९६ रुपैयाँ उपचारका लागि आर्थिक सहयोग गरेको अध्यक्ष सारदा लामिछानेले जानकारी दिइन् । कार्यक्रममा समाजमा ११९ जना आजीवन सदस्य रहेका छन् ।

कार्यक्रममा निवर्तमान अध्यक्ष भोला ओझा, प्रथम उपाध्यक्ष रामकृष्ण तिवारी, सचिव विष्णुहरि तिवारी र कोषाध्यक्ष बद्रीनाथ भुर्तेल लगायतले समाजको महत्व र यसले सामाजिक क्षेत्रमा खेलेको भूमिकाका बारेमा प्रकाश पारेका थिए । समाजका सदस्य बीच पारिवारिक वनभोजको समेत आयोजना गरिएको थियो ।