पोखरा ।
रेवान पोखराको आयोजनामा जारी २७ औं पोखरा सडक महोत्सव अन्तर्गत मंगलबार डुंगा दौड प्रतियोगिता भएको छ । प्रतियोगितामा खुला र संस्थागत गरी २ इभेन्टमा प्रतिस्पर्धा भयो ।

खुलातर्फ हेमन्त राई, विवश भण्डारी र अनिश परियारको टोलीले प्रथम स्थान हाँसिल गर्दा सजेस कसाजु, राज तामाङ र राजकुमार तामाङको टोली दोस्रो बन्यो । कुमार जलारी, गणेश जलारी र कृष्ण जलारीको टोली तेस्रो भयो ।

संस्थागततर्फ रुद्र भुजेल, धनबहादुर परियार र विपिन गुरुङ सम्मिलित फेवा डुंगा व्यवसायी संगठनको टोलीले प्रथम, कृष्ण आचार्य, हरि भुजेल र तीर्थराज सुवेदी सम्मिलित टान गण्डकीको टोलीले द्वितीय तथा विकास कँडेल, रविप्रसाद आचार्य र श्याम लामिछाने सम्मिलित नेपाल पर्यटन यातायात व्यवसायी संघको टोलीले तृतीय स्थान हाँसिल गरे ।

प्रतियोगितामा विजयी हुने टोलीले खसी, द्वितीय स्थान हाँसिल गर्नेले बोका तथा तृतीय स्थान हाँसिल गर्ने टोलीले भाले पुरस्कार पाए । महिलामात्र सम्मिलित टेवानको टोलीलाई विशेष पुरस्कारका रुपमा टोकला चियाको तर्फबाट नगद ५ हजार प्रदान गरिएको थियो ।

उनीहरूलाई नेपाल पर्यटन बोर्ड गण्डकीका प्रमुख मणिराज लामिछाने, पोखरा महानगरपालिका वडा नम्बर ६ का वडाध्यक्ष विष्णु भट्टराई, आयोजक रेवान पोखराका अध्यक्ष विश्वराज पौडेल, महोत्सव संयोजक बसन्त गौतम, खेलकुद कार्यक्रम संयोजक सुमन भट्टराई लगायतले पुरस्कार वितरण गरे ।

महोत्सवमा मंगलबारदेखि रस्साकसी प्रतियोगिता पनि सुरु भएको छ । मंगलबार ल्होसार समेत परेकाले दर्शकहरुको घुँइचो देखियो ।