काठमाडौं । नेपाली कांग्रेसभित्र विशेष महाधिवेशनको पक्षमा रहेका नेताहरूले आगामी पुस २७ र २८ गते नै विशेष महाधिवेशन सम्पन्न गर्न माग गरेका छन् । शुक्रबार काठमाडौंमा पत्रकार सम्मेलन आयोजना गर्दै उनीहरूले यस्तो माग राखेका हुन् ।

पार्टीको पूर्वनिर्धारित कार्यतालिका अनुसार नियमित महाधिवेशन हुन नसकेपछि उत्पन्न परिस्थितिलाई सम्बोधन गर्न महामन्त्रीद्वय गगन थापा र विश्वप्रकाश शर्माले विशेष महाधिवेशनको तयारी अघि बढाएका छन् । सोही योजना अनुसार पुस २७ र २८ गतेका लागि काठमाडौंको भृकुटीमण्डपस्थित सभाहल समेत बुकिङ गरिसकिएको नेताहरूले जानकारी दिएका छन् ।

विशेष महाधिवेशन पक्षधर नेताहरूले पछिल्लो ‘जेनजी’ आन्दोलन र त्यसले पैदा गरेको नयाँ राजनीतिक परिवेशमा अहिलेकै नीति र नेतृत्वबाट पार्टी अघि बढ्न नसक्ने निष्कर्ष निकालेका छन् । आगामी निर्वाचनमा सशक्त ढंगले प्रस्तुत हुनका लागि पनि विशेष महाधिवेशन अपरिहार्य रहेको उनीहरूको तर्क छ ।

पत्रकार सम्मेलनमा बोल्दै नेता देवराज चालिसेले पार्टीको नियमित महाधिवेशन टरेकाले अब विशेष महाधिवेशनको विकल्प नरहेको बताए । ‘नेपाली कांग्रेससँग अब विशेष महाधिवेशनमा जानुबाहेक अन्य कुनै संवैधानिक वा साङ्गठनिक बाटो बाँकी छैन,’ उनले भने ।

कार्यक्रममा सार्वजनिक गरिएको प्रेस विज्ञप्तिमा पार्टी केन्द्रले कार्यकर्ताको भावना बुझ्ने विश्वास व्यक्त गरिएको छ । विज्ञप्तिमा भनिएको छ, ‘हामीलाई पूर्ण विश्वास छ– पुस २७ र २८ गते विशेष महाधिवेशन सम्पन्न गर्ने ऐतिहासिक जिम्मेवारी पार्टीको केन्द्रीय नेतृत्वले पूरा गर्नेछ ।’