पोखरा । प्रधानाध्यापक नियुक्तिका लागि तानातान भइरहेका बेला पोखरा महानगरपालिका–१३ आर्वास्थित रतनपाण्डे माध्यमिक विद्यालयमा संगीता पोखरेल ले जिम्मेवारी पाएकी छन् ।

पोखरा महानगर शिक्षा महाशाखाबाट औपचारिक पत्र प्राप्त भएपछि मंगलबार उनको पदस्थापन गरिएको विद्यालय व्यवस्थापन समितिका अध्यक्ष विष्णुप्रसाद बरालले जानकारी दिए । यसअघि बसेको व्यवस्थापन समितिको बैठकले पोखरेललाई प्रधानाध्यापक नियुक्त गर्ने निर्णय गरेको थियो ।

यसअघि विद्यालयले राहत दरबन्दीका शिक्षक विष्णुप्रसाद दाहाललाई प्रधानाध्यापकको जिम्मेवारी दिएपछि चौतर्फी आलोचना भएको थियो । त्यसअघि डिल्लीराम बराल प्रअ थिए । विद्यालयमा समय कम दिने, सामाजिक र व्यक्तिगत काममा व्यस्त रहने गरेको भन्दै बराललाई हटाएर दाहाललाई नियुक्ति गरिएको थियो । तर बरालले आफूलाई हटाउनुपर्नाको कारण र आधार माग्दै पोखरा महानगरको शिक्षा महाशाखा र जिल्ला शिक्षा समन्वय इकाइ गुहारेका थिए । नियम कानुननले बराल नै प्रअ भए पनि विद्यालयमा भने दाहाल नै प्रअका रुपमा प्रस्तुत थिए । नियम कानुनले राहत र करारका शिक्षकलाई प्रअका रुपमा चिन्दैन ।

यही विवादपछि विद्यालयले निमावि तृतीय श्रेणीकी स्थायी शिक्षिका पोखरेललाई नेतृत्व सुम्पेको हो ।

पदभार ग्रहण गर्दै नवनियुक्त प्रधानाध्यापक पोखरेलले विद्यालयको शैक्षिक तथा भौतिक विकासमा सबै पक्षसँग सहकार्य गर्दै अघि बढ्ने बताइन् । बालविकासदेखि कक्षा १२ सम्म पढाइ हुने विद्यालयमा करिब ३ सय ५० विद्यार्थी अध्ययनरत छन् ।