पोखरा ।  नेपाल रेडक्रस सोसाइटी कास्कीको आयोजनामा कास्कीको अन्नपूर्ण गाउँपालिकामा दुईदिने विद्यालयस्तरीय प्राथमिक उपचार प्रशिक्षण सम्पन्न भएको छ । अन्नपूर्ण–९ तिखेढुङ्गास्थित भगवती माध्यमिक विद्यालयमा सञ्चालित तालिम बुधबार सकिएको हो ।

प्रशिक्षणपछिको मूल्यांकनमा भगवती माविका आयुष विक प्रथम भएका छन् । त्यस्तै, धारापानी माविकी स्मृति पौडेल द्वितीय र भगवती माविकै एलिसा क्षेत्री तृतीय भए ।

समापन समारोहमा रेडक्रस कास्कीकी सभापति उर्मिला खड्काले सहरभन्दा टाढाका गाउँमा हुने दुर्घटनामा प्राथमिक उपचारको महत्त्व बढी हुने बताइन् । उनले विद्यालय तहबाटै विद्यार्थीमा यससम्बन्धी सीप विकास गर्नुपर्नेमा जोड दिइन् । खड्काले रेडक्रसले यस क्षेत्रमा सुधारिएको चुलो वितरण, एक घर एक धारा तथा राहत उद्धारका काम गर्दै आएको स्मरण गराइन् ।

वडा नम्बर ९ का वडाध्यक्ष रमेश गुरुङले वडाको इतिहासमै पहिलो पटक विद्यालयमा प्राथमिक उपचार तालिम भएको बताए । उनले अब गाउँघरमा सामान्य प्राथमिक उपचार नपाएर बिरामीको अवस्था जटिल बन्ने समस्या हट्ने विश्वास व्यक्त गरे ।

गाउँपालिकाभित्रका विद्यालयमा स्थापित जुनियर रेडक्रस सर्कलको सहभागिता रहेको तालिममा रेडक्रस कास्कीका सदस्य सूर्यप्रसाद तिम्सिना ‘पालुवा’ र प्रशिक्षक लीला देवकोटाले सहजीकरण गरेका थिए ।

कार्यक्रममा रेडक्रस कास्कीका उपमन्त्री एवं जुनियर युवा संयोजक डिल्लीराम बराल, दाङसिङ घान्द्रुक उपशाखाका उपाध्यक्ष लक्ष्मी विक, ढिकुरपोखरी उपशाखाका सदस्य कृष्णप्रसाद भण्डारीलगायतले तालिमले विद्यार्थीलाई आपतकालीन जीवन रक्षामा सक्षम बनाउने धारणा राखे ।

विद्यालयका प्रधानाध्यापक एवं सर्कलका संरक्षक कीर्तिराज ढकालले स्वागत गरेको कार्यक्रम सर्कलकी अध्यक्ष सुमिता परियारको अध्यक्षतामा सम्पन्न भएको थियो ।