पोखरा ।
महामन्त्रीद्वय गगन थापा र विश्वप्रकाश शर्माको अगुवाइमा भएको नेपाली कांग्रेसको विशेष महाधिवेशनको पक्षमा गण्डकी प्रदेशका ११ जना सांसद देखिएका छन् । गण्डकीमा कांग्रेसका २७ सांसद हुन् । तीमध्ये कतिपय महाधिवेशन प्रतिनिधिकै हैसियत र कतिपय सहभागिताका लागि गगन नेतृत्वमा आयोजित विशेष महाधिवेशनमा पुगेका थिए । त्यसरी पुग्नेको संख्या ११ देखिएको छ ।

विशेष महाधिवेशनबाट निर्वाचित पदाधिकारीको आधिकारिताको विवाद भने निर्वाचन आयोग पुगेको थियो । सभापति शेरबहादुर देउवा पक्षहरुले आफूहरु आधिकारिक रहेको दाबी शुक्रबार आयोग पुगेरै पेस गरेको थियो । त्यसलगत्तै गगन थापालाई सभापति निर्वाचित गरेको पक्ष पनि पुगेको थियो ।

विशेष महाधिवेशन आयोजना हुँदा नै गण्डकीका ११ जिल्लामध्ये ४ वटाका सभापतिहरुले महाधिवेशनमा भाग लिन आह्वान गर्दै सार्वजनिक अपिल जारी गरेका थिए । तीमध्ये कतिपय प्रदेश सांसदसमेत थिए । गण्डकी प्रदेश सभामा नेपाली कांग्रेसको प्रमुख सचेतक नन्दप्रसाद न्यौपानेसहित सांसदहरु महेन्द्रध्वज जिसी, डिल्लीराम सुवेदी, प्रकाश बराल, चम्पा खड्का, भेषबहादुर पौडेल, टीकाकुमारी बस्याल र अशोक श्रेष्ठले प्रतिनिधिका रुपमा महाधिवेशनमा भाग लिएको स्रोत बताउँछ । त्यसबाहेक प्रतिनिधि नभए पनि सांसदहरु पार्वती तामाङ, रेखा गुरुङ र कल्पना तिवारी पनि महाधिवेशनमा गएका थिए ।

कांग्रेस संसदीय दलका नेता सुरेन्द्र पाण्डेसहित १६ सांसद भने सभापति शेरबहादुर देउवाको संस्थापन पक्षका छन् । विशेष महाधिवेशन हुनुअघि देखि नै कांग्रेसमा तत्कालीन महामन्त्री गगन थापा पक्ष र देउवा पक्ष थियो । त्यसअनुसार गण्डकीमा मुख्यमन्त्री पाण्डेले गगन पक्षमै रहेका र आफ्नो गृहजिल्ला गोरखामा जिल्ला पार्टी सभापति रहेका नन्दप्रसाद न्यौपानलाई संसदीय दलको प्रमुख सचेतकको जिम्मेवारी दिएका थिए ।

त्यसै गरी उनले महेन्द्रध्वज जिसीलाई यसअघिको मन्त्रिपरिषदमा सामेल गरेका थिए भने चम्पा खड्कालाई प्रदेश मामिला तथा संसदीय समितिको सभापतिमा पठाएका छन् । त्यस्तै गगन पक्षधर नै रहेका प्रकाश बराललाई सचेतकको जिम्मेवारी छ । पाण्डेले शक्ति सन्तुलनका लागि आफ्नो विचार समूह इतरकालाई समेत जिम्मेवारी दिएका थिए । तर पाण्डे, न्यौपाने र बराल सबै खसआर्य र पुरुषमात्रै भएको भन्दै आलोचनासमेत हुँदै आएको थियो ।