जोमसोम ।
हिमाली जिल्ला मुस्ताङ आउजाउ गर्ने सवारी साधनलाई कारवाही गर्दा ७ लाख ६१ हजार ५ सय रुपैयाँ राजस्व संकलन भएको छ । जिल्ला प्रहरी कार्यालय मुस्ताङका अनुसार चालु आर्थिक वर्ष २०८१/०८२ को साउनदेखि कात्तिक २४ गतेसम्ममा ट्राफिक नियम विपरीत सवारी साधन चलाउनेलाई कारवाही गर्दा उक्त रकम संकलन भएको हो ।

मुस्ताङका डिएसपी सूर्यबहादुर बोगटीले मुस्ताङमा सवारी र्दुघटना न्यूनीकरण गर्न तथा मापासे र प्रयोजन विपरीत सवारी चलाउनलेलाई कारवाही प्रक्रिया गरिएको बताए । साउनदेखि कात्तिक २४ गतेसम्ममा ५ सय ३२ वटा सवारी साधनलाई कारवाही गर्दा ५ लाख ७५ हजार ५ सय राजस्व संकलन भएको छ ।

चालु वर्षको ४ महिनामा प्रयोजन विपरीत सवारी चलाउने ९३ सवारी साधनलाई कारवाही गर्दा १ लाख ८६ हजार राजस्व उठेको छ । मापासे गरी सवारी चलाउने १ जनालाई कारवाही गरिएको छ ।

जिल्ला ट्राफिक कार्यालय मुस्ताङले कात्तिकको २४ दिनमा मात्रै प्रयोजन विपरीत सवारी चलाउने ५६ वटा सवारीसाधनलाई कारवाही गर्दा १ लाख १२ हजार राजस्व उठाएको छ । चालु वर्षको साउनमा ७५ वटा सवारी साधनलाई कारवाही गर्दा ७१ हजार ५ सय, भदौमा १ सय ६ सवारीलाई कारवाही गर्दा ९० हजार ५ सय, असोजमा १ सय ८१ वटा सवारीलाई कारवाही गर्दा २ लाख ९ हजार र कात्तिक महिनाको २४ गतेसम्म १ सय ७० सवारीलाई कारवाही गर्दा २ लाख ४ हजार ५ सय राजस्व संकलन भएको हो ।

यसअघि २०७७/०७८ देखि२०८०/०८१ सम्ममा जिल्ला ट्राफिक कार्यालय मुस्ताङले१ करोड ४३ लाख ४३ हजार राजस्व संकलन गरेको थियो । जसअन्तर्गत प्रयोजन विपरीत सवारी चलाउने ३ हजार २४९ वटा सवारीलाई कारवाही गर्दा ३७ लाख ९३ हजार ५ सय संकलन भएको थियो ।

अन्य कारवाहीमा १२ हजार १ सय ९७ वटा सवारी साधनलाई कारवाही गर्दा १ करोड ५ लाख ३ हजार राजस्व संकलन भएको थियो । राष्ट्रिय गौरवको (बेनी—जोमसोम—कोरला) सडक सहज हुँदै जान थालेपछि मुस्ताङमा ट्राफिक निगरानीलाई कडाइका साथ कार्यान्वयनमा ल्याईएको छ ।

म्याग्दी हुँदै मुस्ताङ आउजाउ गर्ने सवारी साधनलाई ट्राफिक प्रहरीले ओभर स्पीड, ओभरटेक, सडकको अवस्था, सवारी जाँच गरी यात्रा र सडकको जहाँ पायो, त्यही सवारी पार्किङ गरेर फोटो खिच्ने लगायतलाई व्यवस्थित गर्दै पर्यटकको यात्रा सहज बनाउन क्रियाशील रहेको डिएसपी बोगटीले उल्लेख गरे ।

सवारी साधन चलाउँदा सडकको अवस्था अध्ययन तथा बुझेर सवारी चलाउन र सवारी र सडकको नियम पालना गर्न प्रहरीले अनुरोध गर्ने गरेको छ । प्रहरी कार्यालयको समन्वयमा जिल्ला ट्राफिक कार्यालयले चालक तथा सहचालकसँग १ मिनेट कार्यक्रम र पर्यटक तथा यात्रुसँग २ मिनेट कार्यक्रम सुरुवात गरेको छ । मुस्ताङ भित्रिदै गरेका सवारी साधनलाई लेंक लाग्ने समस्या (अच्टिच्युड)का बारेमा जानकारी गराएर सुरक्षित यात्रा गर्न सुझाउने गरिएको छ ।