पोखरा । पोखरा महानगरपालिका ८ नम्बर वडा बाल मञ्चको आयोजनामा भएको सामाजिक मिडिया समाजका लागि हानिकारक नभई लाभदायक बिषयमा वादविवाद प्रतियोगितामा जनप्रिय माविकी कञ्चन विक प्रथम भएकी छन् ।
त्यसै गरी सृजना माविकी सपना शर्मा द्वितीय, लक्ष्मी आवासीय माविकी सृष्टि आचार्य तृतीय र राम आधारभूत विद्यालयका मिसन मगर सान्त्वना भए ।

प्रमुख अतिथि प्रतियोगिताको वडा अध्यक्ष रुद्रनाथ बरालले बालबालिकाको चौतर्फी विकासमा वडा कार्यालय सधैं सहकार्य गर्न तत्पर रहेको बताए ।

वडा सदस्य पवित्रा केसीले वडा नं. ८ एक सार्वजनिक विद्यालय र १० वटा निजी विद्यालय रहेको जानकारी दिँदै सबैलाई सहभागी गराउन नसके पनि ६ विद्यालयका ११ जना विद्यार्थी प्रतियोगितामा सहभागी भएको बताइन । उनले वडाका बालबालिकाको अतिरिक्त क्रियाकलाप सम्बन्धी कार्यक्रमहरु वडास्तरीय बाल मञ्चलाई नै जिम्मा दिने बताइन् ।
पृथ्वीनारायण क्याम्पसका सहप्राध्यापक डा. नवराज न्यौपानेले विद्यार्थीहरुलाई विभिन्न प्रतियोगितामा सहभागी गराउँदा पढाइको साथै अन्य क्षेत्रमा पनि सक्षम हुने बताए ।

श्रीराम आधारभूत विद्यालयका प्रधानाध्यापक तीर्थराज न्यौपानेले अहिले बालबालिकाहरु मोबाइल बिना कुनै पनि काम गर्न नसक्ने अवस्थामा पुगेको भन्दै मोबाइलमा सामाजिक मिडियालाई विद्यार्थीहरुले कसरी चिन्ने र अरुलाई के चिनाउने प्रयास यस प्रकारका कार्यक्रमले टेवा पुग्ने बताए ।

निर्णायकमा साहारा आधारभूत विद्यालयकी प्रधानाध्यापक लोचना अधिकारी, अधिवक्ता सुस्मा पौडेल र पोखरा महानगरपालिका सामाजिक शाखाकी बेलकुमारी गुरुङ थिए ।

बालमञ्चका अध्यक्ष सुशान न्यौपाने, सचिव समिप सापकोटाले सञ्चालन गरेका थिए भने स्वागत उपाध्यक्ष कृष्मा गिरीले गरेकी थिइन ।