पोखरा । नेपालको कम्युनिस्ट आन्दोलन समस्या र समाधान विषयमा पोखरामा विचार गोष्ठी आयोजना गरिएको छ । चिनिया कम्युनिस्ट नेता माओत्से तुङको १ सय ३२ औं जन्म दिवसको सन्दर्भमा माक्र्सवादी अध्ययन स्रोत केन्द्रले कार्यक्रम आयोजना गरेको हो ।

गोष्ठीमा संस्थाका अध्यक्ष झलकपाणि तिवारीले अवधारणा पत्र प्रस्तुत गरे ।

अवधारणामा आधारित भई गण्डकी प्रदेशमा क्रियाशील वामपन्थी दलका नेताहरुले धारणा राखेका थिए । नेकपा (माओवादी केन्द्र) का नेता खिमलाल देवकोटा, नेकपा (एस)का नेता श्रीनाथ बराल, नेकपा (एमाले) का नेता धनन्जय दवाडी, क्रान्तिकारी कम्युनिस्ट पार्टीका नेता केशबहादुर परियार, राष्ट्रिय जनमोर्चाका नेता शंकर बराल र नेकपा नेता सावित्रा सीले पार्टीका धारणा र कम्युनिस्ट आन्दोलनबारे भनाइ राखे ।

उनीहरुले अहिलेका समस्या समाधान गर्न र कम्युनिस्ट आन्दोलनलाई अग्रगति दिन विद्यमान समस्या र कमजोरीरुको गम्भीर समीक्षा गर्दै पार्टी एकता, संयुक्त मोर्चा, कार्यगत एकता वा बिषयगत सहकार्य जरुरी भएकोमा जोड दिए । केन्द्रले सबै वामपन्थीलाई एकै ठाउँमा उभ्याएर छलफल गरी नयाँ दिशा पर्गेल्ने प्रयास गरेकोमा लेखक रामराज रेग्मीले धन्यवाद दिए ।

कार्यक्रममा संस्थाका सचिव डिल्ली ढुंगाना र उपाध्यक्ष दुर्गा भण्डारीले पनि बोलेका थिए ।