पोखरा । सूर्यदर्शन सहकारी ठगी प्रकरणमा राष्ट्रिय स्वतन्त्र पार्टी (रास्वपा) सभापति तथा पूर्व गृहमन्त्री रवि लामिछानेलाई थुनेरै अनुसन्धान गर्ने कि छोडेर भन्नेबारे मंगलबार कास्की जिल्ला अदालतमा बहस भएको छ । सोमबार सुरु उनको मुद्दाको बहस मंगलबार सकियो ।

लामिछानेको थुनछेक बहस सकिए पनि आदेशका लागि अझै केही दिन लाग्ने छ । अरु पनि प्रतिवादीहरुको बहस बाँकी रहेको हुँदा एकैचोटि आदेश आउने भएको हो । रविको पक्षबाट सोमबार वरिष्ठ अधिवक्ता रमण श्रेष्ठ, सुशील पन्त र सुरेन्द्र थापा (क्षेत्री) ले बहस गरेका थिए । मंगलबार भने वरिष्ठ डा. नारायण घिमिरे, अधिवक्ताहरु राजेन्द्र सेढाईं, सुरज बस्नेत, नारायणदत्त कँडेलसहित ११ जनाले बहस पैरवी गरेका थिए । उनीहरुले रविप्रति राजनीतिक प्रतिशोध साँधिएको र सहकारी ठगीमा उनको संलग्नता नरहेको जिकिर गरेका थिए । मंगलबारै अर्का प्रतिवादी रामबहादुर खनालका तर्फबाट पनि उनका कानुन व्यवसायीहरुले पैरवी गरेका थिए ।

सूर्य दर्शन सहकारी ठगी प्रकरणको मुद्दा न्यायाधीश नीतिज राईको इजलासमा छ । रविको भन्दा अघि छविलाल जोशी बन्जाडे लगायतको बहस थियो । अब अरु प्रतिवादी बाँकी छन् । यो सहकारीमा ४४ जनाविरुद्ध मुद्दा छ ।

कात्तिक २ गते काठमाडौंस्थित आफ्‌नै पार्टी कार्यालयबाट पक्राउ परेका रविमाथि सहकारी ठगी, संगठित अपराध र सम्पत्ति शुद्धीकरण गरी ३ थरी मुद्दा छ । काठमाडौंमा स्वर्णलक्ष्मी सहकारी ठगीमा पनि उनीविरुद्ध मुद्दा चल्ने भएको छ ।