लेखनाथ ।
पुष १८ गतेबाट लेखनाथमा सुरु भएको २० औं संस्करणको लेखनाथ महोत्सव १२ औं दिनसम्म आईपुग्दा लक्ष्यनजिक पुगेको छ । महोत्सव अवधिभर २ लाख ५० हजार दर्शक र ९ करोड कारोेबार गर्ने लक्ष्य लिएको आयोजकले महोत्सव सकिन १ दिन बाँकी छँदासम्म २ लाख ४५ हजार दर्शक भित्राउन सफल भएको छ भने ७ करोड ९५ लाखको कारोबार भएको छ ।

महोत्सव सोमबारमात्रै २५ हजारले अवलोकन गरेको र १ करोड कारोबार गर्न सफल भएको महोत्सवकी प्रचारप्रसार संयोजक जानुका पराजुलीले जानकारी दिइन् । महोत्सव समापनको अघिल्लो दिन किनमेल गर्ने दर्शकको संख्यामा पनि वृद्धि भएको छ ।

महोत्सवमा पहिलो पटक भएको महिलाको हाजिरीजवाफ प्रतियोगितामा पोखरा ३० को नारी विकास आमा समूह प्रथम, पोखरा २६ को सृजना महिला समूह द्वितीय, पोखरा ३० कै गार्डेन सिटी आमा समूह तृतीय र पोखरा २९ को समाज सुधार आमा समूहले सान्त्वना बने । विजयी समूहले क्रमशः २५ हजार, २०हजार, १५ हजार र १० हजार प्राप्त गरेका छन् ।

सोमबार नै विद्यालय स्तरीय चित्रकला प्रतियोगितामा उत्कृष्ट हुन सफल प्रतियोगीलाई पुरस्कार वितरणसमेत गरिएको छ । सोमबार कलाकारहरु प्रजापति पराजुली, तारापति सुवेदी, सरला पाण्डे, राजन कार्की, आशा केसी, लक्ष्मी नेपाली र तारा थापा प्रस्तुति रहने र बेलुका लाईभ कन्सर्टमा प्रमोद खरेलको परम्परा ब्यान्ड र स्थानीय ब्यान्ड सुजित एन्ड दि वार्यस ब्यान्डको प्रस्तुति रहेको थियो ।

महोत्सव मंगलबार पोखरा महानगरपालिकाका प्रमुख धनराज आचार्यले समापन गर्ने तय छ । लेखनाथ उद्योग वाणिज्य संघ र नेपाल उद्योग वाणिज्य महासंघको संयुक्त आयोजनामा हुने महोत्सवको सहआयोजकमा उद्योग तथा पर्यटन मन्त्रालय गण्डकी प्रदेश र नेपाल उद्योग वाणिज्य महासंघ गण्डकी प्रदेश छन् भने प्रवद्र्धकमा पोखरा महानगरपालिका र नेपाल पर्यटन बोर्ड छन् ।