पोखरा । राष्ट्रिय स्वतन्त्र पार्टी (रास्वपा) का निलम्बित सभापति रवि लामिछानेलाई स्वर्णलक्ष्मी बहुउद्देश्यीय सहकारी संस्था ठगी प्रकरणमा ६० लाख रुपैयाँ धरौटीमा रिहा गर्न काठमाडौं जिल्ला अदालतले आदेश दिएको छ।

बुधबार लामिछानेको तर्फबाट वरिष्ठ अधिवक्ता सुशील पन्त र रमण श्रेष्ठसहित सुरज बस्नेत र राजेन्द्रप्रसाद सेढाईंले बहस गरेका थिए।

बचतकर्ता (जाहेरवाला) को तर्फबाट जिल्ला सरकारी वकिल कार्यालयका प्रमुख रामहरि शर्मा काफ्ले, जिल्ला न्यायाधिवक्ता खडिन्द्रराज कटुवाल र सहायक न्यायाधिवक्ता गणेश कुमार शर्माले जवाफी बहस गरे।

पीडितको तर्फबाट वरिष्ठ अधिवक्ता सुरेन्द्र भण्डारी र दिनेश त्रिपाठीले पनि बहस गरे। यस क्रममा लामिछानेले पनि करिब एक मिनेट आफ्नो धारणा व्यक्त गरेका थिए।

गत आइतबार अदालतमा उपस्थित भएका लामिछानेको बयान र थुनछेक बहस सुरु भएको थियो।

प्रहरीको अनुसन्धान अनुसार, गोरखा मिडिया नेटवर्कमा कानुनविपरीत स्वर्णलक्ष्मी बहुउद्देश्यीय सहकारी संस्थाबाट ५ करोड ७८ लाख ९८ हजार ४८० रुपैयाँ लगेको पाइएको छ। रविविरुद्ध सोही रकम बिगो मागदाबी गरिएको छ।