लेखनाथ ।
बालबालिका, स्वास्थ्य र प्रकृतिका लागि ज्ञान तथा वकालत सञ्जाल (कञ्चन) कास्कीले पोखरा महानगरपालिका वडा नम्बर २६ भित्रका सामुदायिक विद्यालयका विद्यार्थीहरूलाई जीवन उपयोगी शिक्षा तालिम प्रदान गरेको छ ।

पोखरा महानगरपालिका वडा नम्बर २६ को सहकार्यमा भएको दुई दिने तालिममा वडाका ६ वटा विद्यालयका करिब ४० जना विद्यार्थीहरूको सहभागिता थियो । तालिम उदघाटन गर्दै पोखरा महानगरपालिका वडा नम्बर २६ का अध्यक्ष नरेन्द्र थापाले बालबालिकाको क्षेत्रमा काम गर्दै आएको संस्थाले युवा लक्षित कार्यक्रममार्फत समाजमा सकारात्मक सन्देश दिन सक्नुपर्ने सुझाव दिँदै संस्था र वडाबीच सहकार्यको आवश्यकता औंल्याएका थिए ।

संस्थाका अध्यक्ष अमर पौडेलको अध्यक्षतामा भएको कार्यक्रममा जीवन उपयोगी शिक्षाका बारेमा जानकारी गराउँदै आर्थिक व्यवस्थापन, मनोविज्ञान, सामाजिक ज्ञान र सिर्जनात्मक सोचाइलगायतका विषयमा प्रशिक्षण दिइएको थियो । कार्यक्रममा संस्थाका कार्यकारी निर्देशक सागर सुनुवारले कार्यक्रमको उद्देश्य र उपयोगिताका बारेमा जानकारी गराउँदै संस्थाले समाज परिवर्तनका लागि बालबालिकालाई व्यावहारिक र प्रयोगात्मक शिक्षाको आवश्यकताका बारेमा जानकारी गराएका थिए ।

दुई दिनसम्म सञ्चालित तालिममा संस्थाकी सचिव नम्रता कोइराला, सदस्य करुणा गुरुङ, सदस्य सुजन गुरुङ र निसा मल्ल ठकुरीलगायतले सहजीकरण गरेका थिए भने कार्यक्रममा पोखरा विश्वविद्यालयका प्राध्यापक डा. अनन्तराज ढुंगाना, प्राध्यापक गणेश शर्मा, पोखरा महानगरपालिका वडा नम्बर २६ का वडा सचिव लीलामणि भण्डारी र संस्थाका उपाध्यक्ष सुदीप गुरुङलगायतले आ–आफ्नो धारणा राखेका थिए ।