पोखरा । गण्डकी प्रदेशका मुख्यमन्त्री सुरेन्द्रराज पाण्डेले अन्तर प्रदेश साझा सरोकारका विषयलाई सामूहिक रूपमा सम्बोधन गर्न पहल आवश्यक पर्ने बताएका छन्। लुम्बिनी प्रदेश सरकारको आयोजनामा अन्तर प्रदेश स्तरीय बैठकलाई बुधबार पाल्पाको रानीमहलमा सम्बोधन गर्दै उनले सडक पूर्वाधार, हवाई यातायात, सुरक्षा, कृषि, पर्यटनलगायत साझा सरोकारका विषयलाई प्राथमिकतामा राखेर अघि बढ्न जरुरी रहेको बताएका हुन्।

उनले प्रदेशका साझा सरोकारका विषयलाई संयुक्त रूपमा आवाज उठाउन जरुरी रहेको धारणा राखे। उनले सुनौली नाका हुँदै भित्रिने भारतीय पर्यटकलाई पोखरासम्म पुर्‍याउने बारेमा पनि साझा योजना आवश्यक पर्ने बताएका छन्। सिद्धार्थ राजमार्गको विस्तार, बसाइँसराइका कारण पहाडहरू रित्तिन थालेको विषय दुई प्रदेशको साझा सरोकारभित्र पर्ने बताएका छन्। साझा मुद्दालाई सामूहिक रूपमा सम्बोधन गर्नुपर्नेमा उनको जोर थियो।

२ प्रदेश मिलेर गर्न सकिने योजनाका साथै संघीयताका कार्यान्वयनका बारेमा अनुभव साट्न यो फोरम उपयुक्त थलो भएको बैठकमा सहभागी गण्डकीका प्रमुख सचिव रघुराम विष्ट बताउँछन् ।

बैठकपछि घोषणापत्रका रुपमा साझा प्रतिबद्धता समेत जारी गरिने भएको छ ।

बैठकमा गण्डकीबाट आर्थिक मामिला मन्त्री टकराज गुरुङ, पर्यटन मन्त्री मित्रलाल बस्याल, नीति तथा योजना आयोगका उपाध्यक्ष कृष्णचन्द्र देवकोटा, प्रमुख सचिव रघुराम विष्ट लगायत सहभागी छन् ।