पोखरा । मुख्य न्यायाधिवक्ताको कार्यालय गण्डकी प्रदेशले बिहीबार पोखरामा गरेको रक्तदानमा ५५ युनिट रगत संकलन भएको छ । म्याग्दी पोखरा सम्पर्क समाजको व्यवस्थापनमा भएको कार्यक्रममा नेपाल रेडक्रस सोसाइटी प्रादेशिक रक्तसञ्चार केन्द्रले प्राविधिक सहयोग गरेको थियो ।

कार्यक्रम उद्घाटन गर्दै गण्डकी प्रदेशका सामाजिक विकास, युवा तथा खेलकुद मन्त्री बिन्दुकुमार थापाले रगत मानवजीवनको सबैभन्दा महत्वपूर्ण वस्तु भएको बताए । यसैको महत्वलाई बुझेर प्रदेशभर रगत निशुल्क पाउने व्यवस्था गण्डकी प्रदेश सरकारले गरेको बताए । बिरामी र आफन्तले रगतका लागि रकम तिर्नु नपरे पनि परीक्षणमा लाग्ने शुल्क तिर्नुप्थ्र्यो । त्यहि शुल्क प्रदेश सरकारले बेहोर्दै आएको छ ।

नेपाल रेडक्रस सोसाइटी गण्डकी प्रदेशका अध्यक्ष सूर्यप्रसाद ढकालले रगतको व्यवस्थापन जटिल कार्य भए पनि मानवीय सेवालाई ख्याल गर्दै रेडक्रसले लामो समयदेखि यसमा काम गर्दै आएको भनाइ राखे ।

गण्डकीका मुख्य न्यायाधिवक्ता चिरञ्जीवी शर्मा पौडेलले छोटो समय र सूचनाका आधारमा पनि यति धेरै सहभागी भएर रगतदान गरेकामा धन्यवाद् व्यक्त गरे । कार्यालयको सामाजिक उत्तरदायित्व अन्तर्गत कार्यक्रम आयोजना गरिएको उनको भनाइ थियो ।

कार्यक्रममा म्याग्दी पोखरा सम्पर्क समाजका अध्यक्ष क्याप्टेन रवीन्द्र गर्बुजा पुनले स्वागत गरेका थिए । मुख्य न्यायाधिवक्ताको निवास माटेपानीमा भएको कार्यक्रममा रक्तदानमा सुरक्षाकर्मी, सरकारी कर्मचारी, स्थानीय बासिन्दा, स्थानीय आमा समूहको उल्लेख्य सहभागिता रहेको उपन्यायाधिवक्ता लालप्रसाद लामिछानेले जानकारी दिए ।