पोखरा । माओवादी संसदीय दलका नेता हरिबहादुर चुमानले संघीयताको प्रभावकारी कार्यान्वयन र कानुन निर्माणका विषयमा सरकारको भूमिकामाथि गम्भीर प्रश्न उठाए । कतिपय कानुनलाई संघ सरकारले रोकिराखेको आरोप लगाए । ‘हामीले यहाँबाट कानुन कार्यान्वयनका लागि नै बनाएका हौं, तर संघ सरकारले कार्यान्वयनको स्थिति दिएको छैन,’ शुक्रबारको प्रदेश सभा बैठकमा उनले भने ।

चुमानले संघीयता नेपालको उपलब्धि भए पनि अहिलेको अभ्यास कमजोर रहेको बताए । ‘हामीले खोजेको संघीयता यसभन्दा बलियो थियो, तर अहिलेको संरचना धेरै नै कमजोर भएको छ,’ उनले भने । संघको कानुनसँग बाझिएर कानुन नबनाउनु गम्भीर गल्ती भएको उनको भनाइ थियो । ‘प्रदेशले आफ्नो नीति बनाउन नसक्नु गलत हो । अब हामी कानुन बनाउनुपर्छ, आवश्यकता परे संघले हेला,’ चुमानले भने, अहिले केही हुनेवाला छैन, केही बन्नेवाला छैन भन्ने स्थिति देखिएको छ । सरकारको जागर देखिँदैन । प्रदेश सभाले अब परिणाममुखी काम गर्नुपर्छ ।’