पोखरा ।
नवआदर्श सामुदायिक विकास समाज लामाचौरले आयोजना गरेको रक्तदानमा १ सय ५ युनिट रगत संकलन भएको छ । हरेक वर्ष फागुन ७ गते प्रजातन्त्र दिवसको अवसरमा समाजको वार्षिक कार्यक्रम अन्तर्गत रक्तदान आयोजना गरिँदै आएको छ ।
यस वर्षको रक्तदान कार्यक्रम २५ औं संस्करणको भएको संस्थाका अध्यक्ष दिनेश भण्डारीले बताए । पोखरा १६ वडा अध्यक्ष अमृत शर्मा तिमिल्सिना र वडा नं. १९ का वडाध्यक्ष पुष्पेन्द्र पाण्डेले रक्तदाता एवं संस्थाका पूर्वअध्यक्ष द्वयबुद्धिबहादुर खत्री क्षेत्री र नवीन भण्डारीलाई संयुक्त रुपमा ब्लड ब्याग हस्तान्तरण गर्दै रक्तदान शुभारम्भ गरे ।

क्षेत्रीले संस्थाको कार्यक्रममा २३ औं पटकको रक्तदान गरिसकेका छन् भने भण्डारीले संस्थामा २४ पटक रक्तदान गरेका थिए । प्रादेशिक रक्त संचार केन्द्रका महेन्द्र केसीले संघ, संस्थाको नियमित रक्तदान कार्यक्रमकै कारण प्रदेशमा निशुल्क रगत उपलब्ध गराउन सकिएको जनाए ।

युवा रेडक्रस सर्कल गण्डकी बोर्डिङ स्कुल, एलसी ब्रदस्र युनाइटेड लामाचौर र जुनियर रेडक्रस सर्कल ईन्द्रराज्य लक्ष्मी मावि लामाचौरको सहआयोजनामा रक्तदान कार्यक्रम आयोजना गरिएको हो । संस्थाका अध्यक्ष दिनेश भण्डारीको अध्यक्षतामा भएको कार्यक्रममा द्वितीय उपाध्यक्ष हरिबहादुर थापा, सचिव शोभा बाँनिया, पोखरा १६ वडाध्यक्ष अमृत शर्मा तिमिल्सिना र वडा नं. १९ का वडा अध्यक्ष पुष्पेन्द्र पाण्डेले बोलेका थिए ।