पोखरा । पोखरेली युवा सांस्कृतिक परिवारले जनकवि केशरी धर्मराज थापा शतवार्षिकी मनाएको छ । संस्थाले भाषा, साहित्य र गीतसंगीतका माध्यमले देशको सेवा गर्ने एक जना दिवंगत स्रष्टाप्रति सम्मान प्रकट गरेको छ ।

कार्यक्रममा साहित्यकार सरुभक्तले जनकविकेशरी धर्मराज थापाजस्तो विशेषता भएको व्यक्ति दोस्रो विरलै भेटिने उल्लेख गरे । थापाले मदन पुरस्कार र जगदम्बा पुरस्कार दुबै पाएका थिए ।

त्यो समयमा पनि उनले देशैभरी घुमेर कउति लेखेका थिए । सरुमक्तले भने, ‘उहाँ कवि हुनुका साथै अनुसन्धानकर्ता पनि हुनुहुन्थ्यो । नेपाल, भारतको पूर्वी भूभाग हुँदै बर्मासम्म पुगेर नेपाली भाषा, गीतसंगीत, नेपालीत्व र नेपाली चेतनाको प्रकाश फिंजाउने उहाँलाई सम्झेर पोखरेली युवा सांस्कृतिक परिवारले प्रशंसनीय काम गरेको छ ।’

जनकवि केशरीका जेठा छोरा मदनराज थापाले जनकवि केशरी कविमात्र नभई अन्वेषक, निम्न वर्गीय जनताका मित्र, लोक संगीतका धरोहर हुनुका साथै समाजमा नवीन चेतनाको प्रवाह गर्ने प्रयोगधर्मी भएको जनाए ।

अर्का छोरा कुन्जराज थापाले जनकविकेशरील्े मनमा लागेका, देखेका र सुनेका कुरासमेत लेख्नुपर्ने धारणा राख्ने गरेको स्मरण गरे ।

कार्यक्रममा लोक गायिका हरिदेवी कोइराला र पोखरा प्रज्ञा प्रतिष्ठानका पूर्व कुलपति पदमराज ढकालले जनकविकेशरीका गीतहरु प्रस्तुत गरे । संस्थाका उपाध्यक्ष लक्ष्मण थापाको अध्यक्षतामा भएको कार्यक्रममा सदस्य शिव संकल्प र सहसचिव हसिना बस्नेतले पनि बोलेका थिए । कार्यक्रममा कविहरु डा ईश्वरमणि अधिकारी र केशु शर्माले थापाका कविता वाचन गरे ।