पोखरा ।
प्राविधिक शिक्षा तथा व्यवसायिक तालिम परिषदको ३७ औं वार्षिकोत्सव परिषदको स्थापना दिवसको अवसरमा विविध कार्यक्रमसहित आयोजना गरिएको छ । कार्यक्रममा भर्ना वर्ष २०७७ का सर्वोत्कृष्ट हुने विद्यार्थीलाई सम्मान गरिएको छ ।

यसरी सर्वोत्कृष्ट हुने विद्यार्थीमा डिप्लोमा इन इन्जिनियरिङतर्फ पोखरा महानगरपालिकाद्वारा सञ्चालित गण्डकी बहुप्राविधिक शिक्षालयका उजेन उदास छन् । स्वास्थ्य कार्यक्रमतर्फ फारवेस्ट टेक्निकल कलेजकी आकृति कुँवर, कृषि, वन, होटल म्यानेजमेन्टतर्फ मदन भण्डारी एकेडेमी उर्लावारीकी भूमिका खतिवडा सर्वाेत्कृष्ट बनेका छन् ।

परिषद सदस्य सचिव महेश भट्टराइको अध्यक्षतामा भएको कार्यक्रममा भौतिक पूर्वाधार मन्त्री देवेन्द्र दाहालले प्राविधिक शिक्षालाई व्यवहारिकता शिक्षा बनाउन सरकार लागिरहेको जनाए । उनले प्राविधिक शिक्षाको सुधार र गुणस्तरका लागि सबैको एकीकृत प्रयास जरुरी भएको औंल्याए ।

कार्यक्रममा शिक्षा विज्ञान तथा प्रविधि मन्त्रालयका सचिव दीपक काफ्ले शिक्षा ऐन छिट्टै जारी हुने विश्वास व्यक्त गर्दै शिक्षा सुधारका लागि मन्त्रालय लागिपरेको जनाए ।