पोखरा ।
पोखरामा जनयुद्धका सहिद तथा बेपत्ता परिवारलाई सम्मान गरिएको छ । सहिद सप्ताहको अवसर पारेर नेकपा (माओवादी केन्द्र) पोखरा महानगर कमिटीले सहिद तथा बेपत्ताका परिवारलाई सम्मान गरेको हो ।

कार्यक्रममा पोखरा महानगरबाट सहिद भएका परिवार तथा बेपत्ताका परिवारहरूलाई सम्मानस्वरूप मायाको चिनो प्रदान गरिएको थियो ।

कार्यक्रममा नेकपा (माओवादी केन्द्र) कास्कीका इन्चार्ज नेत्रनाथ अधिकारी, विशेष अतिथि लेखा समिति सदस्य झलकपाणि तिवारी, केन्द्रीय सदस्य राजकाजी गुरुङलगायतले परिवारजनलाई सम्मान गरेका थिए ।

कार्यक्रमका वक्ताले सहिदहरूको योगदानले आजको लोकतान्त्रिक गणतन्त्र प्राप्त भएको चर्चा गरे । सहिदको सपना पूरा गर्न समाजवादको आधार निर्माण गर्ने योजनाका साथ अघि बढ्नुपर्नेमा नेताहरूको जोड थियो ।

अधिकारीले सहिदहरूको योगदानले आजको लोकतान्त्रिक गणतन्त्र सम्भव भएको उल्लेख गरे । ‘सहिदको सपना पूरा गर्न समाजवादको आधार निर्माण गर्ने योजनाका साथ अघि बढ्नुपर्छ । यो सम्मान कार्यक्रम केवल औपचारिकता होइन, यो बलिदानप्रति हाम्रो नमन र संकल्पको प्रतीक हो ।’

सहिद परिवारको तर्फबाट बोल्दै अनिता भुर्तेलले सहिद परिवारलाई वर्षमा एकचोटि मात्रै होइन, पार्टी नै परिवार बन्नुपर्ने भनाइ राखेकी थिइन् । सहिदका सपना साकार पार्न सरकार र पार्टी नेतृत्व अझ जिम्मेवार बन्नुपर्ने उनले बताइन् ।

महानगर कमिटी अध्यक्ष विज्ञान गिरीको अध्यक्षतामा भएको कार्यक्रमको सञ्चालन महानगर कमिटीका सचिव जनक पराजुलीले गरेका थिए । पोखरा महानगरपालिका लगायत विभिन्न ठाउँबाट पोखरा आएर बसोबास गरिरहेका ४२ सहिद तथा बेपत्ता परिवारलाई सम्मान गरिएको हो ।