लमजुङ । लमजुङको ३ वटा क्याम्पसमा भएको स्वतन्त्र विद्यार्थी युनियन (स्ववियु) निर्वाचनमा नेपाल विद्यार्थी संघ विजयी भएको छ ।

सुन्दरबजार नगरपालिका–९ भोटेओडारस्थित भक्ति आदर्श बहुमुखी क्याम्पस र वडा नम्बर ७ सुन्दरबजारस्थित मातृभूमि बहुमुखी क्याम्पसमा नेविसंघको प्यानलै विजयी भएको हो ।

मध्यनेपाल नगरपालिका–३, सोतीपसलस्थित मंगला क्याम्पसमा नेविसंघको प्यानलै सर्वसम्मत भइसकेको छ ।

मंगलबार भएको मतदानमा भक्ति आदर्श क्याम्पसमा ८१ मत खसेकोमा नेविसंघका उम्मेदवार सुशील अधिकारी ४९ मतका साथ सभापतिमा निर्वाचित भए । अनेरास्ववियुका उम्मेदवार रजिना घलेले ३२ मत पाइन् । सचिवमा नेविसंघका अर्पणा अधिकारी ४६ मतका साथ विजयी भइन् । अनेरास्ववियुका अनिशा सुनारले २९ मत र अखिल (क्रान्तिकारी) का प्रमिला रेग्मीले ३ मत पाइन् ।

मातृभूमि क्याम्पसमा ७५ मत खसेकोमा सभापतिमा विजयी नेविसंघका विशाल थापाले ५५ मत पाए । अनेरास्ववियु उम्मेदवार मन्दिरा सार्कीले १९ मत पाइन् । सचिवका उम्मेदवार नेविसंघका सरला अधिकारी ४६ मतका साथ विजयी भइन् । अनेरास्ववियुका उम्मेदवार सृजना सार्कीले २६ मत पाइन् ।

सदरमुकाम बेंसीसहरमा रहेको मर्स्याङ्दी बहुमुखी क्याम्पसमा ५ सय ४९ मतदाता रहेकोमा ४ सय १३ मत खसेको छ । सुन्दरबजारस्थित कृषि र पशु विज्ञान अध्ययन संस्थान (लमजुङ क्याम्पस) मा ४ सय ७३ मतदाता रहेकोमा सत प्रतिशत मत खसेको छ । मध्यनेपाल नगरपालिका ४, दुइपिप्ले रम्घास्थित पुष्पलता जनएकता क्याम्पस र वडा नम्बर ६, भोर्लेटारस्थित ईशानेश्वर क्याम्पसमा चुनावी प्रक्रिया नै अघि बढेको छैन ।