लेखनाथ ।
एमाले निकट नेपाल बुद्धिजीवी परिषद पोखरा २६ ले आइतबार गणतन्त्रको अपरिहार्यताबारे अन्तर संवाद आयोजना गरेको छ । गणतन्त्र पक्षधर पार्टीहरुको सहभागितामा कार्यक्रम गरिएको हो ।

कार्यक्रममा एमाले गण्डकी प्रदेश सचिवाल सदस्य दिलीपविक्रम शाहीले राजतन्त्रको विकल्पमा गणतन्त्रको स्थापना भए पनि गणतन्त्रको विकल्प राजतन्त्र नभएको ठोकुवा गरे । एमाले पोखरा महानगर अध्यक्ष दिलीप न्यौपानेले जनतालाई संगठित र सचेत बनाउनका लागि यस प्रकारको कार्यक्रमलाई अगाडि सारिएको जनाए ।

कार्यक्रम संयोजक श्रीभद्र बरालको अध्यक्षतामा भएको कार्यक्रममा नेपाली कांग्रेसको तर्फबाट कृष्ण भाट, नेकपा एमालेको तर्फबाट मनहरि ढुंगाना र नेकपा माओवादीको तर्फबाट अनिल परियार लगायतले बोलेका थिए । वक्ताहरुले जनतामा भएको असन्तुष्टि ठूला दलले सम्बोधन गर्न नसक्दा निराशा थप सघन भएको विचार राखे ।