समाधान संवाददाता, पोखरा

नेपाली माटो सुहाउँदो समाजको असली पार्टी समाजवादी भएको उम्मेदवार धर्मराज गुरुङले दाबी गरेका छन् । उपनिर्वाचनमा घरदैलो अभियानका क्रममा पोखरा १५ रामबजार पुगेका गुरुङले सत्ताको बागडोर सम्हालिरहेको नेकपा र प्रतिपक्षको कमजोर भूमिकामा देखिएको कांग्रेसले जनताको आकांक्षा र समाजको आवश्यकतालाई पूरा गर्न नसक्ने बताए ।

‘सरकार भ्रष्टाचार र अराजकतामा रमाइरहेको छ । जनताका आवश्यकता दुई तिहाईको छाँयामा परेको छ,’ उनले भने, ‘लामो समय शासन गरेको कांग्रेसले पनि जनताको आवाजलाई उठाउन नसकिरहेका बेला समाजवादी पार्टी ती सबै आवश्यकतालाई जोड्ने गरी चुनावी मैदानमा होमिएको छ ।’ उनले तराई, मधेस, हिमाल पहाड जोड्ने अभियानमा रहेको समाजवादीप्रति जनताको आशा र भरोसा जोडिएको दाबी गरे । ‘सरकार एकपछि अर्को काण्डमा फस्यो । हत्या र बलात्कारका दोषीलाई पक्राउ गर्नै सकेन । अहिले आँसुको राजनीति गर्न खोजिरहेको छ’ उनले थपे ।

भ्रष्टाचार र लोभलालचमा लाग्नेबिरुद्ध खबरदारी गर्न र जनताको असली आवाज संसदमा पु¥याउन आफूले उम्मेदवारी दिएको उनको भनाइ छ । ठूला आश्वासन होइन, काम गरेर देखाउन चुनावी मैदानमा होमिएको उनलेब ताए । समाजवादी पार्टीले घरदैलो अभियानलाई तीव्र बनाएको नेता किरण थापाले बताए ।

आइतबार र सोमबार समाजवादीले वडा नम्बर १५ मै घरदैलो गर्ने छ । मंसिर ८ गते पोखरामा समाजवादीका शीर्ष नेता बाबुराम भट्टराई, उपेन्द्र यादव, अशोक राई लगायतको उपस्थितिमा सभा आयोजना हुने थापाले जानकारी दिए ।