पोखरा । राष्ट्रिय प्रजातन्त्र पार्टीका अध्यक्ष राजेन्द्र लिङ्देनसहितका सांसदहरू सिंहदरबारबाटै समातिएका छन् ।

गत चैत १५ तीनकुनेमा भएको प्रदर्शनका क्रममा पक्राउ परेका नेता कार्यकर्ताको रिहाइका लागि प्रदर्शनमा उत्रिएका लिङदेनसहितका नेताहरूलाई प्रहरीले सिंहदरबारभित्रैबाट पक्राउ गरेको हो ।

सिंहदरबारस्थित संसदीय दलमा रोकिएका प्रमुख सचेतक ज्ञानेन्द्र शाही, सांसदहरू दीपक सिंह र बिना लामासहितलाई भेट्न आएका लिङ्देनसहित पक्राउ परेका हुन् ।

उनीहरूलाई भेटेपछि लिङ्देनसहितले सिंहदरबारभित्रै पर्चासहित प्रदर्शन गरेका थिए । प्रहरीले राप्रपा उपाध्यक्ष बुद्धिमान तामाङ र प्रमुख सचेतक ज्ञानेन्द्र शाहीलाई पनि पक्राउ गरेको छ । सिंहदबारस्थित संसदीय दलको कार्यालयमा थुनिएका शाहीहसितलाई भेटेपछि त्यहीँबाट लिङ्देनले विरोध थालेका थिए ।

दलको कार्यालयबाट केही सांसदहरूसहित हिँडेका लिङ्देन नेतृत्वको टोलीले सिंहदरबार भित्रै पर्चा देखाउँदै प्रदर्शन गरे । उनीहरूलाई नयाँबानेश्वरको निषेधित क्षेत्रतर्फ जान नदिई प्रहरीले नियन्त्रमा लिएर लगेको छ ।