पोखरा ।
नवौं पोखरा स्पोर्टस अवार्डका लागि खेलाडी र प्रशिक्षकहरुको मनोनयन सार्वजनिक गरिएको छ ।

नेपाल खेलकुद पत्रकार मञ्च गण्डकीको आयोजनामा यहि वैशाख २६ गते आयोजना हुने स्पोर्टस अवार्डका लागि विभिन्न ४ विभिन्न विद्यामा १२ जनाको नाम सार्वजनिक गरिएको हो । जस अनुसार वर्ष उत्कृष्ट खेलाडी पुरुषमा विश्वास अधिकारी (भलिबल), प्रदिप खड्का (टेनिस) र सुमित श्रेष्ठ (फुटबल) रहेको खेलकुद पत्रकार मञ्च गण्डकीका अध्यक्ष एमबी आस्थामगरले जानकारी दिए ।

वर्ष उत्कृष्ट खेलाडी महिलामा अरुणा शाही (भलिबल), कृपा गुरूङ (फेन्सिङ) र सुष्मिता थापामगर (आइटिएफ तेक्वान्दो/मुआथाई) रहेकी छिन् । वर्ष उत्कृष्ट उदियमान खेलाडीमा बादल कार्की (एथलेटिक्स), जितबहादुर सार्की (भलिबल), रचना चौधरी (क्रिकेट) छिन् ।

वर्ष उत्कृष्ट प्रशिक्षकमा निरज थापा (टेनिस), रमेश केसी (भलिबल) र राजेन्द्र तामाङ (फुटबल) छन् । पोखरा स्पोर्टस अवार्डमा वर्ष उत्कृष्ट महिला र पुरुष खेलाडीले ट्रफीसहित इलेक्ट्रिकल स्कुटर हात पार्ने छन् भने उदियमान खेलाडी प्रशिक्षकले ट्रफीसहित जनही नगद ३५ हजार प्राप्त गर्ने आयोजकले जनाएको छ ।

मञ्चले सोही दिन लाइफटाइम अचिभ्मेन्ट अवार्ड, वर्ष उत्कृष्ट खेल संस्था वा क्लब र वर्ष उत्कृष्ट खेल पत्रकारलाई पनि सम्मान गर्ने अध्यक्ष मगरले जानकारी दिए । उनका अनुसार लाइफटाइम अचिभ्मेन्ट अवार्ड प्राप्त गर्नेलाई चाँदीको करुवा, ट्रफी, ताम्रपत्र र दोसल्लाले सम्मान गरिनेछ । भने, खेल संस्था वा क्लब र पत्रकारलाई जनही नगद ३५ हजार रुपैयाँ र ट्रफी प्रदान गरिनेछ ।