पोखरा । पोखरा महानगरपालिका वडा नम्बर २, मिरुवामा बुधबारदेखि नयाँ इलेक्ट्रिक भेहिकल चार्जिङ स्टेशन सञ्चालनमा आएको छ । बागलुङ राजमार्गमा अवस्थित विन्ध्यवासिनी मन्दिरबाट करिब २०० मिटर उत्तरतर्फ रहेको यो चार्जिङ स्टेशनले इलेक्ट्रिक गाडी प्रयोगकर्ताहरूका लागि ठूलो राहत प्रदान गर्ने अपेक्षा गरिएको छ ।

यो चार्जिङ स्टेसनको शुभारम्भ लामो समयदेखि इलेक्ट्रोनिक व्यवसायमा सक्रिय गुडविल इलेक्ट्रोनिक्सका प्रोप्राइटर कमलश्रेष्ठले गरेका हुन् । इभी गौ फास्ट चार्जिङ स्टेशन नाम दिइएको यस स्थानमा हाल ८० किलोवाट क्षमताको चार्जर जडान गरिएको छ, जसले गाडीको ब्याट्रीलाई ३० मिनेटमा २० प्रतिशत देखि ८० प्रतिशतसम्म चार्ज गर्न सक्छ ।

श्रेष्ठका अनुसार यो स्टेसनमा एकैपटक ४ वटा इलेक्ट्रिक गाडीहरू द्रुत गतिमा चार्ज गर्न सकिने सुविधा छ । ‘हामीले यात्रुहरूको सहजताका लागि यो चार्जिङ स्टेसन सञ्चालनमा ल्याएका हौं । आवश्यकता अनुसार भविष्यमा थप चार्जरहरू पनि जडान गर्ने योजना छ,’ उनले बताए ।

यो चार्जिङ स्टेसन विशेष गरी बिन्ध्यवासिनी मन्दिर दर्शन गर्न आउने श्रद्धालुहरू र कुस्मा, पर्वत, बागलुङ हुँदै मुक्तिनाथ जाने यात्रुहरूलाई लक्ष्य गरेर बनाइएको हो । बागलुङ राजमार्गमा पर्ने यो स्थानमा चार्जिङ स्टेसन सञ्चालनमा आएसँगै इलेक्ट्रिक गाडी प्रयोगकर्ताहरूको यात्रा अझ सहज र भरपर्दो हुने यात्रुहरूले अपेक्षा गरेका छन् ।

चार्जिङ स्टेसनमा आधुनिक डिजिटल डिस्प्ले र प्रयोगकर्तामैत्री इन्टरफेससहितको चार्जर जडान गरिएको छ । पोखरामा इलेक्ट्रिक गाडीको प्रयोग बढ्दै गएको सन्दर्भमा यो चार्जिङ स्टेसनले दिगो यातायात र वातावरण संरक्षणमा पनि योगदान पु¥याउने विश्वास लिइएको छ ।

स्थानीय बासिन्दा र मुक्तिनाथ दर्शन गर्न इभी गाडी लिएर हिँडेका श्रद्धालुहरूले पनि यो स्टेशन खुलेपछि निकै सहज भएको बताएका छन् र धन्यवाद तथा आशीर्वाद दिएका छन् । यो सुविधाको स्वागत गर्दै आगामी दिनमा यस्ता चार्जिङ स्टेसनहरू थप विस्तार गर्नुपर्ने सुझाव पनि दिएका छन् ।