पोखरा ।
पोखराका पर्यटन व्यवसायीले तनहुको बन्दीपुर गाउँपालिकासँग पर्यटन क्षेत्रमा सहयोग आदानप्रदान गर्नेबारे छलफल गरेका छन् । ट्रेकिङ एजेन्सिज एसोसिएसन अफ नेपाल (टान) गण्डकीको नेतृत्वमा गएको पर्यटन व्यवसायीको टोली बन्दीपुर गाउँपालिकाद्वारा आयोजित अन्तिरक्रियामा सहभागी बनेको छ ।

पयर्टन व्यवसायी तथा स्थानीय सरोकारवालासँगको अन्तरक्रियामा पोखरा भ्रमण वर्ष सन् २०२५ र बन्दीपुर भ्रमण वर्ष सन् २०२५ बारे चर्चा गरिएको थियो । बन्दीपुर गाउँपालिका अध्यक्ष सुरेन्द्रबहादुर थापाले पहाडकी रानी बन्दीपुर भ्रमण गर्न आन्तरिक र बाह््य पर्यटकलाई अनुरोध गरेका छन् ।

बन्दीपुरलाई एग्रो टुरिजमको विकास गर्नका लागि भ्रमण वर्ष मनाउन लागिएको थापाले बताए । भ्रमण वर्षमा ५ लाख पर्यटक भित्राउने लक्ष्य उनले सुनाए । नेपाल पर्यटन बोर्ड पोखरा कार्यालयका प्रमुख मणिराज लामिछानेले पोखरा आउने पर्यटक पहाडको सुन्दरता हेर्न बन्दीपुर जान सक्ने बताए ।

टान गण्डकी अध्यक्ष कृष्णप्रसाद आचार्यले नेपालको पर्यटकीय राजधानी आउने पर्यटक आदानप्रदान गर्नका लागि आफूहरु लागेको बताए । कार्यक्रममा बन्दीपुर गाउँपालिकाका जनप्रतिनिध, भ्रमण वर्षका संयोजक एवं पर्यटन व्यवसायी वैश गुरुङ, सहसंयोजक, बन्दीपुर होटल संघ रेवान बन्दीपुरका प्रतिनिधि लगायतले बन्दीपुर भ्रमण वर्षबारे बोलेका थिए ।