जोमसोम ।
विश्वकै अग्लो स्थानमा रहेको तिलिचो ताल जाने पदमार्गमा पर्यटक बासस्थान निर्माण गरिएको छ । मुस्ताङको घरपझोङ ५ ठिनीबाट कैसाङ क्याम्प हुँदै तिलिचो ताल जाने सबैभन्दा छोटो पर्यटकीय पदमार्गमा पर्यटक बासस्थान निर्माण गरिएको हो ।

राष्ट्रिय प्रकृति संरक्षण कोष, अन्नपूर्ण संरक्षण क्षेत्र आयोजना इलाका संरक्षण कार्यालय (एक्याप) जोमसोमको आर्थिक सहयोग तथा संरक्षण क्षेत्र व्यवस्थापन समिति जोमसोमको समन्वयमा सैनिक उच्च शिखर शिक्षालय कैशाङको जनश्रमदानबाट समुन्द्री सतहको ४ हजार ५ सय ४५ मिटरमा भवन बनेको हो ।

ड्रम्प क्याम्प नजिक पर्यटक बासस्थान निर्माण भएको एक्याप जोमसोमका कार्यालय प्रमुख राजेश गुप्तले जानकारी दिए । ‘एक्याप कार्यालयबाट इकुपमेन्ट खरिदका लागि २ लाख ५० हजार, समितिको समन्वय र शिक्षालयको भौतिक श्रमदानबाट पर्यटक बासस्थान निर्माण भयो’, कार्यालय प्रमुख गुप्ताले भने ‘इकुपमेन्ट जडानदेखि जमिन सम्याउने र फिटिङको काम सबै शिक्षालयबाट भएको छ ।’

४ हजार ८ सय १९ मिटरमा अवस्थित तिलिचो ताल जोड्ने पर्यटकीय पदमार्गमा सैनिक उच्चशिखर शिक्षालयका सैनिक टोलीले फलामे ट्रस जडान गरेर जस्तापाताले पर्यटक बासस्थान निर्माण भएको संरक्षण क्षेत्र व्यवस्थापन समिति सचिव पवन गुरुङले जानकारी दिए । बाँसस्थान पूर्वाधारले तिलिचो पदमार्गमा आउजाउ गर्ने आन्तरिक तथा बाह्य पर्यटकलाई कुुनै समस्या परेमा वा साँझमा बस्ने सुविधा प्राप्त भएको संरक्षण व्यवस्थापन समिति सचिव गुरुङले उल्लेख गरे ।

मुस्ताङबाट सबैभन्दा छोटो तिलिचो पदमार्गमा यात्रा गर्ने पर्यटकलाई मौसम प्रतिकूल हुँदा, हिमपात र हावाहुरी आउँदा बासस्थानका लागि नवनिर्मित पर्यटक बासस्थानले सहज बनाउने अपेक्षा गरिएको छ ।

मुस्ताङको सैनिक उच्च शिखर शिक्षालय कैसाङका सुरक्षाकर्मीले पूर्वाधार निर्माणका लागि निर्माण सामग्री जोमसोमबाट उक्त स्थानसम्म ढुवानी गरेको एक्यापले जनाएको छ । शिक्षालयले एक महिना खर्चिएर त्यहाँ पर्यटक बासस्थान निर्माण गरी एक्याप कार्यालयलाई हस्तान्तरण भएको हो ।

मुस्ताङको घरपझोङ ५ ठिनी गाउँ हुँदै तिलिचो जाने २ पर्यटकीय पदमार्ग छन् । जोमबाट ठिनी नमखुलेंक हुँदै मेसोकोन्दो पास कटेपछि तिलिचो ताल जाने पर्यटकीय पदमार्ग छ । अर्को ठिनीबाट सैनिक उच्च शिखर शिक्षालयको तालिम केन्द्र कैसाङ हुँदै छमाताल ड्रम्प क्याम्प हुँदै मेसोकोन्दो पास छेउमा निस्किएर केही घण्टाको पैदल यात्रापछि तिलिचो ताल पुग्न सकिन्छ ।

ठिनी हुँदै नमखु सम्म प्रदेश सरकारले कच्ची सडक विस्तार गरेकाले त्यहाँबाट तिलिचो ताल ६ घन्टाको पैदलयात्रा तय गरेपछि तिलिचो ताल पुग्न सकिने ठिनीका स्थानीय नरेन्द्र थकालीले बताए । ठिनी गाउँबाट सैनिक उच्च शिखर शिक्षालय कैसाङसम्म सवारी साधन जाने सडक बाटो निर्माण भइसकेको छ । यहाँबाट पनि करिब ५—६ घन्टाको पैदल यात्राबाट तिलिचो ताल पुग्न सकिने स्थानीय थकालीको भनाइ छ ।

गत वर्ष एक्याप जोमसोम र घरपझोङ गाउँपालिकालेमुस्ताङबाट तिलिचो पदमार्गको मर्मत तथा स्तरोन्नति गरेका थिए ।