पोखरा । कास्कीका पालिकाहरुमध्ये सबैभन्दा कम बेरुजु माछापुच्छ्रे गाउँपालिकाको आर्थिक अनुशासनका अब्बल दरिएको छ । महालेखापरीक्षकको कार्यालयले सार्वजनिक गरेको ६२औँ वार्षिक प्रतिवेदन अनुसार गएको आर्थिक वर्षमा १ अर्ब ५२ करोड ६६ लाख रुपैयाँको लेखा परीक्षणमा ३६ लाख ६२ हजार रुपैयाँ मात्र बेरुजु देखिएको छ । कुल परीक्षण अंकको शून्य दशमलव २४ प्रतिशत हो ।

रुपा गाउँपालिको बेरुजु पनि १ प्रतिशत भन्दा कम छ । रुपामा ७६ करोड ८ लाख रुपैयाँको लेखा परीक्षण हुँदा ५० लाख रुपैयाँ बेरुजु देखिएको छ । जुन लेखा परीक्षण अंकको शून्य दशमलव ६६ प्रतिशत हो ।

अन्नपूर्ण गाउँपालिकाको बेरुजु १.४६ प्रतिशत छ । अन्नपूर्णमा १ अर्ब ५० करोड ४६ लाख रुपैयाँको लेखा परीक्षण हुँदा २ करोड १८ लाख रुपैयाँ बेरुजु देखिएको छ ।
यसैगरी कास्की मादी गाउँपालिकाको बेरुजु २.३५ प्रतिशत छ । मादीमा १ अर्ब २ करोड ७३ लाख रुपैयाँको लेखा परीक्षण हुँदा २ करोड ४१ लाख रुपैयाँ बेरुजु देखिएको महालेखाको प्रतिबेदनमा उल्लेख छ ।

पोखरा महानगर पालिका भने कास्कीका पालिका मात्र नभइ देशभरकै महानगरमध्ये सबैभन्दा बढी बेरुजु हुनेमा दरिएको छ । गत आर्थिक वर्षमा लेखा परीक्षण गरिएको रकमध्ये ५० करोड ४३ लाख रुपैयाँ बेरुजु देखिएको छ । १३ अर्ब ४६ करोड ७२ लाख रुपैयाँको लेखा परीक्षणमा ५० करोड ४३ लाख रुपैयाँ बेरुजु देखिएको छ, जुन ३.७४ प्रतिशत हो ।