पोखरा । प्रदेश सरकारअन्तर्गतका १ सय ८३ सरकारी निकायमा स्वीकृत ३ हजार ४११ दरबन्दीमध्ये हालसम्म २ हजार ८३ कर्मचारी मात्रै पदस्थापन भएका छन्। बाँकी १ हजार ३२८ पद रिक्त छन्, जसले कुल स्वीकृत दरबन्दीको ३९ प्रतिशत हिस्सा ओगट्छ।

सरकारी निकायहरूको जनशक्ति अभावले सेवा प्रवाहमा प्रत्यक्ष असर परिरहेको प्रदेश सरकारको प्रतिवेदनमा उल्लेख गरिएको छ। यस्तै, सीमित आन्तरिक स्रोतलाई समेत ध्यानमा राख्दै प्रदेशको कार्य सम्पादन र संस्थागत क्षमता अभिवृद्धिका लागि पुनः संगठन तथा व्यवस्थापन (ओ एण्ड एम) सर्वेक्षण आवश्यक रहेको महालेखाको पछिल्लो प्रतिवेदनमा औँल्याइएको छ। यो प्रतिवेदनका लागि काम भइरहँदा चालु आर्थिक वर्षमा प्रदेश लोक सेवा आयोगले ठूलो संख्यामा पदपूर्ति गरेको छ ।