पोखरा ।
प्रधानमन्त्री केपी शर्मा ‍‍ओलीले अब राजतन्त्र फर्कने सम्भव नभएको बताएका छन् । नेकपा (एमाले) निकट युवा संघ नेपालको पोखरामा शुक्रबार आयोजति दशौं राष्ट्रिय महाधिवेशनको उद्घाटन सत्रलाई सम्बोधन गर्दै ओलीले राजतन्त्र फर्कने सपना कहिल्यै पूरा नहुने बताएका हुन् ।

जनताले राजतन्त्र उल्टाएर फालिसकेको बताउँदै देशमा अर्काे संविधान बनिसकेको बताए । राजावादी पार्टी र संघसंस्थाहरुले १५ जेठदेखि गर्ने भनेको आन्दोलनलाई कटाक्ष गर्दै उनले भने, ‘आउने १५ गते राजालाई सिंहासनमा राख्छन् रे । घरमै सिंहासन बनाएर राख्ने होला । देशको राज सिंहासन गइसक्यो ।’

सरकारलाई स्थिर रहने नदिने प्रपञ्च भइरहेको प्रधानमन्त्री ओलीकाे भनाइ छ । भष्ट्रचार गर्नेहरु सरकार कायम रहेमा भष्ट्रचार उदांगिने डरमा रहेकाे उनले बताए । उनले थपे, ‘ हामी भष्ट्रचारका विरुद्ध लड्ने छौं । जेल जानेहरु आफ्नो क्रियाकलापले जेलमा गएका हुन् । हामीले षड्यन्त्र गरेर जेल पठाएका होइनौं ।’