पोखरा । एनसेल पाँचौँ टाइगर कप राष्ट्रिय तथा अन्तर्राष्ट्रिय आमन्त्रित खुला क्लब च्याम्पियनसिप महिला तथा पुरुष भलिबल प्रतियोगिताबाट आयोजकले २१ लाख रुपैयाँ बचत गरेको छ ।
आयोजक टाइगर ग्रुप अफ पोखरा नेपालले बुधबार पोखरामा पत्रकार सम्मेलन गरी प्रतियोगिताबाट २१ लाख १ हजार ६ रुपैयाँ बचत गरिएको जानकारी दिएको हो । संस्थाका अध्यक्ष नारायणप्रसाद शर्माले प्रतियोगिताबाट १ करोड ७१ लाख ८९ हजार आम्दानी भएकामा १ करोड ५० लाख ८८ हजार खर्च कटाई उक्त रकम बचत भएको जानकारी दिए ।
आयोजकले आम्दानीतर्फ टिकटबाट मात्र ५७ लाख ३९ हजार ४४६ रुपैयाँ आम्दानी गरेको अध्यक्ष शर्माले जानकारी दिए । यस्तै मुख्य प्रायोजक एनसेलले १७ लाख, सहप्रायोक सुश्री मिडिया प्रालिले १६ लाख, प्रदेश खेलकुद परिषद् गण्डकी र पोखरा महानगरपालिकाले १०÷१० लाख रुपैयाँ दिएको थियो ।
पुरस्कार तथा प्रोत्साहनमा मात्रै २२ लाख ३९ हजार खर्च गरेको छ । सहभागी टिम तथा यातायातमा नेपाली टिमतर्फ २४ लाख १० हजार र विदेशी टिमतर्फ ३५ लाख १७ हजार खर्च गरको छ ।
संस्थाका अध्यक्ष शर्माले बचत बचत सामाजिक सेवामा समर्पित तथा स्वास्थ्य, शिक्षा एवं खेलकुद अभियानमा सहयोग गर्ने प्रतिबद्धता जनाए । यसपालि संस्थाले प्रदेश खेलकुद परिषद् गण्डकीलाई खेलाडी कल्याणकारी कोषका लागि १ लाख ५० हजार प्रदान गरेको उनले जानकारी दिए ।
प्रतियोगिता पोखरा रंगशालास्थित भलिबल कोर्टमा गत माघ १२ देखि २० सम्म चलेको थियो । उक्त प्रतियोगितामा भारत र थाइल्यान्डको टिमसहित पुरुषतर्फ ६ र महिलातर्फ ६ टिमले भाग लिएका थिए ।
नेपाल भलिबल संघको संयोजनमा भएको प्रतियोगितामा पुरुषतर्फ नेपाल पुलिस र महिलातर्फ आयोजक टाइगर ग्रुप अफ पोखराले उपाधि जितेको थियो ।