पोखरा ।

संघीय सरकारले गण्डकी प्रदेश सरकारलाई ‘राइड सेयरिङ’सम्बन्धी नियमावली कार्यान्वयन तत्काल रोक्न निर्देशन दिएपछि मुख्यमन्त्री सुरेन्द्रराज पाण्डे छलफलमा जुटेका छन् । राइड सेयरिङसम्बन्धी वार्ता टोलीसँग मुख्यमन्त्री पाण्डे छलफलमा जुटेको प्रेस संयोजक नरहरि सापकोटाले जानकारी दिए । ‘भौतिक पूर्वाधार मन्त्रालयको सचिव ज्यू लगायतसँग मुख्यमन्त्री छलफलमा बस्नुभएको छ । आधा घन्टापछि प्रेस नोट सार्वजनिक हुन्छ,’ संयोजक सापकोटाले भने ।

मंगलबार साँझ प्रधानमन्त्री तथा मन्त्रिपरिषद् कार्यालयमार्फत नियमावली स्थगन गरी सार्वजनिक यातायात सामान्य अवस्थामा ल्याउन सहयोग पु¥याउन आग्रह गरिएको छ ।
सोमबार राति सार्वजनिक यातायात बचाउ संघर्ष समिति र सरकारबीच भएको ६ बुँदे सहमतिअनुसार नियमावली स्थगत गर्न आग्रह गरेको हो । संघ सरकारले प्रदेशहरूले जारी गरेका निजी सवारी साधन (रातो नम्बर प्लेट) मार्फत यात्रु ओसार्न दिने नियमावली स्थगन गर्न अनुरोध गरिएको छ । भौतिक पूर्वाधार तथा यातायात मन्त्री देवेन्द्र दाहालको सिफारिसमा मन्त्रिपरिषद् कार्यालयमार्फत पत्र गण्डकी आइपुगेको संयोजक सापकोटाले बताए ।

पत्रमा भनिएको छ, ‘सार्वजनिक यातायात बन्दका कारण जनजीवन प्रभावित भएको सन्दर्भमा जनजीवन सामान्य बनाउने वातावरण बनाउन प्रदेश सरकारको नियमावली अन्तर्गत रहेका राइड सेयरिङ प्रावधान तत्काल स्थगन गर्न अनुरोध गरिन्छ ।’