पोखरा ।
सामाजिक उत्तरदायित्वअन्तर्गत पोखरा लर्नर्स एकेडेमीले प्लास्टिक प्रदूषणविरुद्ध सातदिने अभियान सुरु गरेको छ । गत जेठ १८ देखि २३ गतेसम्म वातावरण सप्ताह मनाउने क्रममा कक्षा ६, ७ र ८ मा अध्ययनरत विद्यार्थीहरूले पोखरा–६, लेकसाइडस्थित केदारेश्वर मन्दिर परिसरमा सरसफाइ कार्यक्रम सञ्चालन गरेका छन् । विद्यालयका प्राचार्य विधान गौतमले यो अभियानले निरन्तरता पाइरहेको जानकारी दिए ।

विद्यार्थीहरूको अतिरिक्त क्रियाकलापअन्तर्गत पोखरा–७ मा रहेको लर्नर्स एकेडेमीले सरसफाइ अभियानलाई तीव्रता दिएको छ । वातावरण सप्ताहको अवसरमा विद्यार्थीहरूले केदारेश्वर मन्दिर परिसरमा सरसफाइ कार्यक्रम सम्पन्न गर्दै यस वर्षको विश्व वातावरण दिवसलाई सफल बनाउने प्रतिबद्धता जनाएका छन् । ‘प्लास्टिक प्रदूषणविरुद्ध एकजुट होऔँ’ भन्ने नारालाई आत्मसात् गर्दै उनीहरूले प्लास्टिक र अन्य फोहोर संकलन गरी वातावरण संरक्षणको सन्देश प्रवाह गरेका छन् ।

सहभागी विद्यार्थीहरूले भने, ‘प्लास्टिकका कारण हाम्रा ऐतिहासिक मन्दिर र प्राकृतिक सौन्दर्यमा असर परिरहेको हामीले महसुस गरेका छौँ । त्यसैले सरसफाइमार्फत प्लास्टिक प्रदूषणविरुद्ध अभियान सुरु गरेका हौँ ।’ विद्यालयका माध्यमिक तहका संयोजक कृष्णप्रसाद लम्सालले विद्यार्थीहरूको सक्रियताको प्रशंसा गर्दै भने, ‘विद्यार्थीमा वातावरणीय चेतना जगाउन र प्लास्टिक प्रदूषणविरुद्ध व्यवहारिक कदम चाल्न प्रेरित गर्नु हाम्रो मुख्य उद्देश्य हो ।’

यसै क्रममा विद्यार्थीहरूले पोस्टर निर्माण, निबन्ध लेखन, वादविवाद प्रतियोगिताजस्ता गतिविधि सञ्चालन गरेका छन् । प्लास्टिक प्रदूषण न्यूनीकरणमा योगदान पु¥याउने लक्ष्यसहित विद्यालयले आगामी दिनमा प्लास्टिकको प्रयोग घटाउने, पुनःप्रयोग गर्ने र पुनःप्रशोधन गर्ने अभ्यासलाई प्रोत्साहन गर्ने योजना बनाएको छ । वातावरण सप्ताहको समापनमा सरसफाइमा सक्रिय विद्यार्थीहरूलाई सम्मान र पुरस्कार वितरण गरिनेछ । आगामी दिनमा रचनात्मक कार्यक्रमलाई निरन्तरता दिइने शिक्षक आदर्श घिमिरेले बताए ।