पोखरा ।
लायन्स क्लब अफ सेतीगंगको आयोजनामा पोखरा–१२, ढिकालेथरस्थित सरस्वती आधारभूत विद्यालयमा २ हजार लिटरको खानेपानी ट्यांक्ी हस्तान्तरण गरिएको छ । गण्डकी एरिया चिफ महेश श्रेष्ठले विद्यालय व्यवस्थापन समितिका अध्यक्ष बलबहादुर कार्की र प्रधानाध्यापक रुद्र रानाभाटलाई उक्त ट्यांकी हस्तान्तरण गरे ।

कार्यक्रममा एरिया चिफ श्रेष्ठले अहिलेको सुख्खा मौसममा विद्यालयमा देखिएको पानीको अभावलाई यो सहयोगले केही हदसम्म भए पनि राहत पुर्‍याउने विश्वास व्यक्त गरे । विद्यालय व्यवस्थापन समितिका अध्यक्ष बलबहादुर कार्कीले सरकारको नजरमा ओझेलमा परेको विद्यालयलाई लायन्स क्लबले खानेपानी ट्यांकी उपलब्ध गराएर विद्यार्थीहरूलाई निकै राहत मिलेको बताए ।

रिजन चियरपर्सन दिनेश तुलाचनले विद्यालयलाई आवश्यक सामग्री उपलब्ध गराएर क्लबले राम्रो कार्य गरेको बताए । जोन चियरपर्सन तीर्थ श्रेष्ठले ‘जहाँ आवश्यकता, त्यहाँ लायन्स’को उपस्थिति हुने र बालबालिकालाई अध्ययनबाट वञ्चित हुन दिन नहुने कुरामा जोड दिइन् ।

विद्यालयका प्रधानाध्यापक रुद्र रानाभाटले विभिन्न संघसंस्थाको सहयोगबाट विद्यालय सञ्चालन भइरहेको र हाल त्यहाँ १७० जना विद्यार्थी रहेको जानकारी दिए । सो ट्यांकी ‘हिल टप मन्त्र थकाली रेस्टुरेन्ट’बाट सहयोगस्वरूप प्राप्त भएको क्लबका कार्यवाहक अध्यक्ष सिर्जना हिराचनले बताइन् । उक्त कार्यक्रमको स्वागत मन्तव्य सह–सचिव ममता गौचनले दिइन् भने कार्यक्रम सञ्चालन अमिता राजभण्डारीले गरिन् ।