पोखरा ।
पोखरा १९ घार्मीमा रहेको महेन्द्र माध्यमिक विद्यालयले २०८१ सालको एसइईमा उत्कृष्ट अंक ल्याउने विद्यार्थीलाई सम्मान गरेको छ । उत्कृष्ट नतिजा हाँसिल गर्ने अयुब सुनार, त्रिशांक पौडेल र प्रमिशा पौडेललाई सम्मान गरिएको छ ।

१० जनाले ३.२ देखि ३.६ जिपिए, ३ जनाले २.६६ देखि २. ८८ जिपिए प्राप्त गरेका छन् । उनीहरूलाई पोखरा १९ का वडाध्यक्ष पुष्पेन्द्र पाण्डे, पूर्व वडाध्यक्ष शोभामोहन पौडेल, विद्यालय व्यवस्थापन समिति अध्यक्ष बैकुण्ठ पौडेल लगायतले सम्मान गरे ।

विद्यालय व्यवस्थापन समितिका अध्यक्ष पौडेलको अध्यक्षतामा भएको कार्यक्रममा वडाध्यक्ष पाण्डेले महेन्द्र माविले शैक्षिक विकासमा गरेको उदाहरणीय प्रगतिको प्रशंसा गर्दै विद्यालयको शैक्षिक विकासमा वडाले सम्भव भएसम्म सघाउने वाचा गरे ।

पूर्ववडाध्यक्ष शोभामोहन पौडेलले विद्यालयका शिक्षक, विद्यार्थी, विद्यालय व्यवस्थापन समिति तथा अभिभावकको लगातारको मेहनतले परीक्षाको नतिजामा प्रगति भएको बताए । प्रधानाध्यापक बासुदेव पौडेलले बोर्ड परीक्षामा विद्यालयले विद्यार्थीका लागि अपनाएको शिक्षण प्रक्रियाका विभिन्न योजना र अन्य गतिविधिमाथि प्रकाश पारे ।

कार्यक्रममा विद्यालयका संस्थापक अध्यक्ष महेश्वर पौडेल, वडा शिक्षा समितिका सदस्य लेखनाथ लामिछाने, प्राध्यापक नारायण पौडेल, ईन्द्रराज्य लक्ष्मी माविका सह प्रधानाध्यापक बलबहादुर श्रेष्ठ, अभिभावक शोभा पौडेल, विव्यस सदस्य रमेश विक, सहायक प्रधानाध्यापक नन्दराज दाहालविद्यार्थी आयुब सुनार लगायतले बोलेका थिए ।

महेन्द्र माविबाट २०८१ को एसइईमा १८ जना सहभागी रहेको ९० प्रतिशत ग्रेडेड भएका छन् ।