काठमाडौँ। गृह मन्त्रालयले अध्यागमन विभागका महानिर्देशक र त्रिभुवन अन्तर्राष्ट्रिय विमानस्थल अध्यागमन कार्यालयका प्रमुखसहित पाँच जना सहसचिवको सरुवा गरेको छ।

मन्त्रालयले सहसचिव रामचन्द्र तिवारीलाई अध्यागमन विभागको महानिर्देशकको जिम्मेवारी दिएको छ। यसअघि मन्त्रालयको सुरक्षा तथा समन्वय महाशाखा प्रमुख रहेका तिवारीले गोविन्दप्रसाद रिजालको स्थान लिएका हुन्। रिजाललाई गृह मन्त्रालयमा सरुवा गरिएको छ।

त्यस्तै, त्रिभुवन अन्तर्राष्ट्रिय विमानस्थलस्थित अध्यागमन कार्यालयको प्रमुखमा सहसचिव नरहरि घिमिरेलाई पठाइएको छ।उनले हाल खोटाङको प्रमुख जिल्ला अधिकारीको जिम्मेवारी सम्हालिरहेका थिए। घिमिरेले यसअघि अख्तियार दुरुपयोग अनुसन्धान आयोगमा प्रवक्ताको भूमिका पनि निर्वाह गरिसकेका छन्।

विमानस्थल अध्यागमन कार्यालयका हालका प्रमुख विष्णुप्रसाद कोइरालालाई गृह मन्त्रालयमा तानिएको छ। यसैगरी, गृह मन्त्रालयमा कार्यरत सहसचिव कल्पना श्रेष्ठलाई खोटाङको प्रमुख जिल्ला अधिकारीको जिम्मेवारी दिइएको छ।