पोखरा ।

पोखरा थिएटरमा शुक्रबारदेखि नाटक ‘पीडा गीत’ मञ्चन हुने भएको छ । गार्डेन थिएटरको प्रस्तुतिमा मञ्चन हुने उक्त नाटकलाई चे शंकरले निर्देशन गरेका हुन् भने यसलाई कलाकार तथा लेखक खगेन्द्र लामिछानेले लेखेका हुन् ।

एकालाप शैलीको यस नाटकमा रोशन ज्ञवालीको एकल अभिनय रहनेछ । “लामो समयपछि रंगमञ्चमा फर्किँदा म उत्साहित छु,” कलाकार ज्ञवालीले भने ।

नाटकले भरियाको एक्लो जीवनकथा मार्फत समाजको यथार्थ चित्रण गर्ने निर्देशक चे शंकरले बताए । “यो नाटक समाजको प्रतिबिम्ब हो । यसले आम नेपालीको राजनीतिक, सांस्कृतिक र सामाजिक अस्तित्वको सङ्कटलाई छर्लङ्ग पारेको छ,” उनले थपे ।

नाटक गैह्रापाटनस्थित पोखरा थिएटरमा शुक्रबार साँझ ५:३० बजे तथा शनिबार दिउँसो १:०० बजे र साँझ ५:३० बजे मञ्चन हुनेछ ।