स्याङ्जा ।
स्याङ्जामा किराना पसलबाट बियर, रक्सी र कुखुराको मासुसहितका सामान चोरेको अभियोगमा एक युवक पक्राउ परेका छन् । जिल्ला प्रहरी कार्यालय स्याङ्जाले पुतलीबजार नगरपालिका-६ का २२ वर्षीय तोरण परियारलाई पक्राउ गरेको हो ।

प्रहरीका अनुसार, परियारले साउन १४ गते राति पुतलीबजार-६, टक्सार काउलेस्थित नर बहादुर गुरूङको किराना पसलमा चोरी गरेका थिए । उनले पसलबाट १७ बोतल रियल गोल्ड बियर, १ कार्टुन सोफी रक्सी, ९ प्याकेट चुरोट, २० प्याकेट चाउचाउ र २५ केजी कुखुराको मासु चोरेको प्रहरीले जनाएको छ ।

चोरीको सूचना पाएपछि खटिएको प्रहरी टोलीले अनुसन्धानका क्रममा परियारलाई साउन १५ गते चोरीका केही सामानसहित उनकै घरबाट पक्राउ गरेको हो ।

पक्राउ परेका परियारलाई जिल्ला अदालत स्याङ्जाबाट चोरी मुद्दामा सात दिनको म्याद थप गरी थप अनुसन्धान अघि बढाइएको जिल्ला प्रहरी कार्यालयका सूचना अधिकारी, प्रहरी नायव उपरीक्षक प्रसन्नराज चौधरीले जानकारी दिए ।