लेखनाथ ।
जागरुक नागरिक समाज कास्कीले चौथो स्थापना दिवसको अवसरमा सुशासन, विकास र समृद्धिका विषयमा वक्तृत्वकला प्रतियोगिता आयोजना गरेको छ । प्रतियोगितामा त्रिभुवन शान्ति मावि पोखरा ३० का टंंकबहादुर चर्माले प्रथम स्थान हाँसिल गरेका छन् ।

त्रिवेणी पब्लिक स्कुलकी निश्मा गुरुङ दोस्रो, लक्ष्मी आदर्श माविकी रोशन रावल तृतीय र अल्फा ऐकेडेमीकी रोजनी पुरी सान्त्वना ठहरिए । प्रतियोगितामा प्रथम, द्वितीय, तृतीय र सान्त्वनाले क्रमशः १० हजार, ७ हजार, ५ हजार र ४ हजार रुपैयाँका साथमा प्रमाणपत्र र ट्रफी पाएका छन् ।

प्रतियोगितामा लेखनाथ क्षेत्रका माध्यमिक तह (कक्षा ९–१२) का २० विद्यालयका ४० विद्यार्थी सहभागी थिए । कार्यक्रममा कास्की शिक्षा महाशाखाका प्रमुख हेमप्रसाद आचार्यले सामाजिक विकृति हटाउन सबै तहका नागरिकले सचेत हुनुपर्ने बताए । उनले भने, ‘विद्यार्थी, शिक्षक र नागरिक समाजले मिलेर मात्र समाजलाई अगाडि लैजान सकिन्छ । पुरस्कारभन्दा सहभागिता नै सफलताको मापदण्ड हो ।’

जागरुक नागरिक समाज कास्कीका अध्यक्ष रामहरि ढुंगानाले सुशासन र समृद्धिका लागि सबै नागरिकलाई राष्ट्रिय झण्डामुनि एकजुट हुन आह्वान गरे । उनले संस्थाले वृक्षारोपण, सचेतना कार्यक्रम, रक्तदान र कृषि क्षेत्रमा विभिन्न अभियान सञ्चालन गर्दै आएको जानकारी दिए ।

कार्यक्रममा पोखरा महानगरपालिका वडा नम्बर २९ का वडाध्यक्ष श्रीप्रसाद गुरुङ, लेखनाथ उद्योग वाणिज्य संघका वरिष्ठ उपाध्यक्ष राजेन्द्र ओझा, लेखनाथ खानेपानी उपभोक्ता संस्थाका अध्यक्ष मुरारी शर्मा र कार्यक्रम संयोजक लक्ष्मीप्रसाद ढुंगाना (एलपी) लगायतले बोलेका थिए ।

प्रतियोगिताको निर्णायक मण्डलमा नेपाली भाषा शिक्षक परिषद्का सूर्यप्रसाद लम्साल, शिवहरि सुवेदी र ऋषिकेश बराल थिए ।