पोखरा ।
नेपाली नारीको सांस्कृतिक पर्व हरितालिका तीज नजिकिँदै आउँदा तीज गीतको संख्या पनि बढ्दै गएको छ । दिनहुँ जसो नयाँ नयाँ तीजका गीत र भिडियो सार्वजनिक भएका छन् ।

पुरानादेखि नवोदित गायक गायिकाले समेत यसपालिको तीजमा आफ्ना प्रस्तुतिलाई दर्शक स्रोतामाझ ल्याएका हुन् । तीजकै छेकोमा नवोदित गायिका लक्ष्मी खनाल पौडेलले पनि ‘बाबा आमालाई सेवा गरौ’ जस्तो सामाजिक मौलिक गीत सार्वजनिक गरेकी छन् ।

मोति डिजिटलले बजारमा ल्याएको गीतमा गायिका लक्ष्मीलाई सन्जु खनाल र सुष्मा खनालले साथ दिएका छन् । गीतमा लय र शब्द माधवप्रसाद खनालको छ । भिडियोको निर्माण मोति डिजिटल स्टुडियोले गरेको हो ।

महेश्वर खनाल दिदी बहिनी समूहको प्रस्तुति रहेको गीतमा बाबा आमालाई सेवा गरौं, ज्येष्ठ नागरिक समाज र परिवारको आस्था, धरोहर भएको विषयलाई गीतमार्फत प्रस्तुत गरिएको गायिका पौडेलले बताइन् । ग्रामीण परिवेश र आफ्नै पाखा पखेरामा गाईने भाका र शब्दलाई गीतमा प्रस्तुत गरिएको छ ।

केही दिन अगाडि मोति डिजिटल युट्युब च्यानलमा सार्वजनिक भएको सो मौलिक गीतले राम्रै भ्युज पाएको छ । सोही समूहले सन्जु खनालको आवाजमा ‘दिदी भाइको गन्थन’ मौलिक तीज गीत पनि सार्वजनिक गरेको छ ।