पोखरा । नेपाल पर्वतारोहण संघ गण्डकी प्रदेश र नेपाल पर्यटन बोर्ड गण्डकी प्रदेश कार्यालयले पर्यटन पथप्रदर्शकका लागि वाइल्डनेस, प्राथमिक उपचार, नक्साको प्रयोग, पर्वतीय पदयात्रा र नेभिगेसन तालिमको आयोजना सुरु भएको छ ।

गण्डकी अल्पाइन क्लब र काठमाडौं वातावरणीय शिक्षा परियोजना (किप)को प्राविधिक सहयोगमा भएको तालिममा ३० पथप्रर्दशकको सहभागिता छ । आइतबारदेखि सुरु भएको तालिम ६ दिनसम्म सञ्चालन हुने पर्वतारोहण संघ गण्डकी अध्यक्ष विकास गुरुङले जानकारी दिए । तालिममा डा अभिमन्यु श्रेष्ठ, डा राजेन्द्रमान कर्माचार्य, उदयमान श्रेष्ठ लगायतले सहजीकरण गर्ने छन् ।

नेपाल पर्यटन बोर्ड गण्डकी प्रदेशका निर्देशक मणिराज लामिछानेले तालिमको उद्घाटन गरे । लामिछानेले पोखरा आउने पर्यटकमध्ये ७० देखि ८० प्रतिशत पदयात्राका लागि जाने जानकारी दिए । उनले पर्यटनको राजधानी पोखरा र पोखरा भ्रमण वर्ष २०२५ घोषणा भएको सन्दर्भमा धेरैभन्दा धेरै दक्ष प्रथप्रर्दशक आवश्यक पर्ने उल्लेख गरे ।

उनले मौसम पूर्वानुमान र नक्सा हेरेर पथप्रर्दशन गर्न जानेको भए हुदहुद आँधीमा मानवीय क्षति नहुने दाबी गरे । नेपाल पर्वतारोहण संघ गण्डकी प्रदेशका पूर्वअध्यक्ष शेषकान्त शर्माले पर्यटकको पथप्रदर्शकको काम गरेर जीविकोपार्जन गर्न सम्भव भएको बताए । पोखरामा २ हजार ५ सयदेखि ३ हजार पथप्रर्दशक रहेको जानकारी दिदै उनले अन्तर्राष्ट्रिय मापदण्डका पथप्रर्दशक कमी भएको उल्लेख गरे ।

शर्माले पथप्रर्दशकलाई दुई दिनको लागि न्यूनतम २ हजार पारिश्रमिक आवश्यक पर्ने बताए । संघका सचिव मनशान्त घिमिरेले दक्ष जनशक्तिको अभावलाई अहिलेको तालिमले थोरै भए पनि सम्बोधन गर्ने जनाए ।