पोखरा ।
पोखरा महानगरपालिका वडा नं. २७ को तालचोकमा अवस्थित डायमन्ड माध्यमिक विद्यालयले गाईजात्रा पर्वको अवसरमा विशेष सांस्कृतिक कार्यक्रम गरेको छ । डायमन्ड कार्निभल नाम दिई शुक्रबार आयोजना गरिएको सो कार्यक्रममा विद्यार्थीले गाईजात्रा पर्वको मौलिक संस्कृति झल्काउने विभिन्न प्रस्तुति दिए ।

विद्यालय परिसरमा आयोजित कार्यक्रममा विद्यार्थीले परम्परागत पहिरनमा सजिएर आकर्षक नृत्य प्रदर्शन गरे । कार्यक्रममा गाईजात्राको धार्मिक–सांस्कृतिक महत्व समेट्दै श्रद्धाञ्जली र हास्यपूर्ण व्यंग्य शैलीमा उत्सवलाई सजाइएको छ ।

सामाजिक शिक्षा विभाग प्रमुखको प्रमुख रमेश परियारको संयोजन र नेपाली विभागको सहकार्यमा भएको सो कार्यक्रममा विभिन्न पारम्परिक लोकगीत, नेवारी नृत्य, व्यंग्य तथा हास्य प्रस्तुति भए ।

विद्यालयका संस्थापक निर्देशक माधवशरण उपाध्याय र विद्यालयका संस्थापक व्यवस्थापक हरिप्रसाद लामिछानेले कार्यक्रममा बोलेका थिए ।