पोखरा ।

शुक्ला साहित्य प्रतिष्ठान पोखरा १६ बाटुलेचौरले राष्ट्रिय कृष्ण भजन प्रतियोगिता २०८२ गर्न लागेको छ । कृष्ण जन्माष्टमी अवसरमा प्रतिष्ठानले आगामी साउन ३१ गते बाटुलेचौरको मैदानमा २६ औं सस्करणको प्रतियोगिता गर्न लागेको हो ।

प्रतिष्ठानका अध्यक्ष दुर्गादेवी बस्नेत गौतमले लोक सम्पदा र संस्कृतिको जगेर्ना गर्न सकेमात्र साहित्य र सुसंस्कृत समाज निर्मााण गर्न सहयोग पुग्ने भएकाले भजन प्रतियोगिता गरेको जानकारी दिइन् । ‘लोक संस्कृति र साहित्यको उर्वरभूमि बाटुलेचौरमा प्रतिष्ठानले कला, संस्कृति, भाषा र साहित्यको जगेर्ना गर्नका लागि राष्ट्रिय स्तरको कार्यक्रम गर्दै आएको छ,’ उनले भनिन्, ‘साहित्यका विविध विधालाई समेटेर काम गर्दै आएको प्रतिष्ठानले विगत ३६ वर्षदेखि उल्लेख्य पुरस्कार राशिसहित भव्य र सभ्य रुपमा भजन प्रतियोगिता निरन्तर रुपमा गरेको छ ।’

उनले कृष्ण जन्माष्टमीको सबै गतिविधि गर्न अनुमानित १६ लाख खर्च लाग्ने बताइन् । अध्यक्ष बस्नेतले प्रतियोगितामा प्रथम, द्वितीय, तृतीय र सान्त्वना स्थान हासिल गर्ने भजन समूहलाई क्रमशः १ लाख, ७५ हजार, ५० हजार र २५ हजार नगद पुरस्कारको व्यवस्था गरिएको जनाइन् ।

प्रतियोगिता गर्न अध्यक्ष बस्नेतको संयोजकत्वमा मुल आयोजक समिति र विभिन्न २३ उपसमिति गठन गरिएको छ । पोखरा महानगरपालिका वडा नम्बर १९ का अध्यक्ष पुष्पेन्द्र पाण्डेले कला, साहित्य र संस्कृतिको देश विकासको समग्र विकासको मापन हुने बताए । उनले कला साहित्यलाई मानवीय विकास र सभ्यताको सूचकको रुपमा लिइने जानकारी दिए ।

भजनका संयोजक नेत्रबहादुर बस्नेतले प्रतिष्ठानले नयाँ पुस्तालाई भजन सिकाउन ध्यान दिने बताए । उनले भजन प्रतियोगितामा शब्द, लय र ताललाई ध्यान दिने उल्लेख गरे । अर्थ समितिका संयोजक सुमनराज पौडेलले तीन तहको सरकार र आजीवन सदस्यलाई जोडेर आर्थिक संकलनको काम भएको जनाए ।

कार्यक्रममा प्रतिष्ठानका संरक्षक कुञ्जराज थापा, वरिष्ठ उपाध्यक्ष गीता भट्टराई भण्डारी, सचिव रामप्रसाद पौडेल, सहसचिव तथा प्रचारप्रसार संयोजक सञ्जय थापा लगायतले कृष्ण भजन प्रतियोगिताको तयारीबारे बोलेका थिए । ‘कला, साहित्य र संस्कृतिको जगेर्ना हाम्रो गन्तव्य’ भन्ने मूल नाराका साथ काम गर्दै आएको प्रतिष्ठानले साहित्यका विविध विधालाई समेट्दै वार्षिक कार्ययोजना निर्माण गरी साहित्यिक गोष्ठी, कार्यशाला तथा सेमिनार गर्दै आएको छ । जनकवि केशरी धर्मराज थापाको अध्यक्षतामा २०४५ सालमा शुक्ला साहित्य प्रतिष्ठान गठन भएको हो ।