पोखरा ।

पोखरा महानगरपालिका वडा नं. २९ ले हरितालिका तीजको अवसरमा आयोजना गरेको वडास्तरीय तीज महोत्सव सम्पन्न भएको छ । वडाले हरेक वर्षझैँ यस वर्ष पनि वडाभित्रका आमा तथा महिला समूहहरूलाई एकै ठाउँमा भेला गरी नाचगान र प्रतियोगितासहित महोत्सव आयोजना गरेको हो ।

महोत्सवअन्तर्गत आयोजित वडास्तरीय तीज गीत प्रतियोगितामा लगनशील महिला समूह प्रथम भएको छ । १२ समूहको सहभागिता रहेको प्रतियोगितामा नारी उत्थान आमा समूह द्वितीय र आमा मिलन समूह तृतीय भए । त्यस्तै, नवीनज्योति महिला समूह र मिलिजुली आमा समूहले सान्त्वना स्थान हासिल गरे ।

यसैगरी, नृत्यतर्फको उपाधि जनप्रकाश माध्यमिक विद्यालयको समूहले जितेको छ ।

यसअघि महोत्सवको उद्घाटन गर्दै पोखरा महानगरपालिकाकी उपमेयर मञ्जुदेवी गुरुङले धर्म, संस्कृति संरक्षणसँगै तीजका गीतलाई जनचेतनामूलक बनाउन आग्रह गरिन् ।

पोखरा–२९ की वडा सदस्य एवं कार्यपालिका सदस्य निर्मला पौडेलको अध्यक्षतामा भएको कार्यक्रममा वडाध्यक्ष श्रीप्रसाद गुरुङले आफ्नो संस्कृति जोगाउनु वडाको दायित्व भएको बताए । कार्यक्रमको सञ्चालन वडा सदस्य कालिदास पोखरेल र वडा सचिव दुर्गा न्यौपानेले गरेका थिए ।

प्रतियोगिताको निर्णायकमा लोकदोहोरी गायक तारापति सुवेदी, शिवहरि ढुंगाना र शीतला अधिकारी रहेका थिए ।