पोखरा । पोखराको चिप्लेढुंगा स्थित सर्वेश्वर व्यवसायी समिति र पराजुली मार्गका व्यवसायीलाई शनिबार कर तथा वित्तीय साक्षरता अभिमुखीकरण दिइएको छ । पोखराको चिप्लेढुंगादेखि गैह्रापाटनसम्म फैलिएको सर्वेश्वर मार्ग र पराजुली मार्गका होलसेल व्यवसायीको साझा संस्था सर्वेश्वर व्यवसायी समितिले कर कार्यालय पोखरा र ग्लोबल आईएमई बैंकसँगको सहकार्यमा कार्यक्रम गरेको हो ।

व्यवसायीलाई कर कार्यालय पोखराका कर अधिकृत सोनु काफ्लेले करका विषयमा सहजीकरण गरे । उनले समयमै करको विवरण राखेर कर तिर्नुपर्ने बताए । अन्यथा व्यवसायी कारवाहीमा पर्न सक्ने प्रष्ट्याए । करसम्बन्धी समस्याबाट बच्न व्यवसायी चनाखो बस्नुपर्ने बताउँदै उनले भने, ‘व्यवसायीले व्यवसाय दर्ता गर्ने, बिल छाप्ने, आम्दानी, खर्च र बचत छुट्याएर राख्ने, जसका लागि खरिद खाता र बिक्री खाता चुस्त बनाउनुपर्छ ।’
उनले कर विवरण सही रुपमा भए/नभएको बुझ्न बेला बेला आफ्नो पान नम्बर खोलेर हेर्नुपर्नेसमेत बताए । बिल दुरुपयोग हुन नदिन र दाखिला गरेको कर ठीक भए÷नभएको पनि ख्याल गर्नुपर्ने उनको सुझाव छ ।

ग्लोबल आइएमई बैंकका गण्डकी प्रदेश प्रमुख सुसोमन देवकोटा र बैंकको न्युरोड शाखा प्रमुख मन्दीप बरालले बैंकिङ कारोबारबारे सहजीकरण गरे । उनीहरुले व्यक्ति र व्यवसायको छुट्टाछुट्टै बैंक अकाउन्ट खोल्नुपर्ने र व्यक्तिको हो भने व्यक्तिगत प्रयोगका लागि मात्र प्रयोग गर्नुपर्ने बताए ।

सर्वेश्वर व्यवसायी समिति अध्यक्ष तुलबहादुर थापा (राजन)ले व्यवसायीलाई कर तथा बैंकिङ कारोबारसम्बन्धी डिजिटल साक्षरता प्रदान गरिएको बताए ।