जोमसोम ।
उपल्लो मुस्ताङको कोरला नाका जोड्ने यहाँको वारागुङ मुक्तिक्षेत्र ४ कागबेनी खोलामा बेलिब्रिज निर्माणसँगै त्यहाँ जाने सवारी साधनलाई आवतजावतमा सहज भएको छ । २ वर्षअघि निर्माणको अन्तिम चरणमा पुगेको पक्की पुल खोलाले बगाएपछि कालिगण्डकी करिडोर (बेनी—जोमसोम—कोरला) सडक आयोजनाले कागबेनी खोलामा बेलिब्रिज निर्माण गरेको हो ।

कोरला नाका जोड्ने कागबेनी खोलामा बेलिब्रिज निर्माणका लागि न्यु कालिका वर्कसप बार लगायतले काम गरेका थिए । बेलिब्रिजको दुईतर्फी फाउन्डेसन वालमा १० लाख, बेलिब्रिजका लागि अपुग स्टील पार्टमा १० लाख र बेलिब्रिज जडान कार्यमा १० लाख खर्च भएको आयोजनाका सूचना अधिकारी बिष्णु चापागाईले जानकारी दिए ।

‘कागबेनीमा बेलिब्रिज स्थापनाका लागि फाउन्डेसन वालसहित बेलिब्रिज जडानको काम अन्तिम चरणमा पुगेको छ,’ आयोजनाका सूचना अधिकारी चापागाईले भने, ‘अब २ दिनभित्र बेलिब्रिज जडान कार्य सकिने र दायँबायाँ एप्रोज सडक निर्माण भई यातायातका साधन सञ्चालन हुनेछ ।’

मुस्ताङकोे कागबेनीमा २०७५ देखि निर्माणाधीन पक्की पुलमा २०८० साउन २८ गतेको कागखोलाको बाढीले बगाएर क्षति पुगेको थियो । कोरला सडक अन्तर्गत अधिकांश स्थानमा मोटरेबल पुल बनिसकेको भए पनि कागखोलामा पुल नहुँदा उपल्लो मुस्ताङ र कोरलानाका आउजाउ गर्ने सवारी साधनलाई समस्या परेकाले बेलिब्रिज निर्माणलाई प्राथमिकता दिइएको सूचना अधिकारी चापागाईको भनाइ छ ।

वारागुङ मुक्तिक्षेत्र ४ स्थित कागखोलामा बेलिब्रिज जडानका लागि कोरला सडक अन्तर्गत म्याग्दीको गलेश्वर स्थित राहुघाट खोलामा रहेको बेलिब्रिज स्थान्तरण गरिएको हो । ‘म्याग्दीको राहुघाट खोलामा पहिले बेलिब्रिज थियो, त्यहाँ पक्की पुल बनिसकेकाले उक्त बेलिब्रिज जगेडा थियो,’ चापागाईले भने, ‘हामीले कागेखोलामा तत्कालका लागि बेलिब्रिजको आवश्यकता महसुस ग¥यौं । त्यहाँका बेलिब्रिज उप्काएर यहाँ स्थापना गरेका हौं ।’

कागखोलामा बेलिब्रिज जडानका लागि अलग अलग ठेक्कामार्फत बेलिब्रिज निर्माणको कामअघि बढाइएको हो । आयोजनाले त्यहाँ बेलिब्रिज स्थापना गर्न साउनको दोस्रो साता राहुघाटको जगेडा बेलिब्रिज ढुवानी गरी मुस्ताङ ल्याईपुर्‍याएको थियो । यहाँ फाउन्डेसन पहिल्यै निर्माण गरिएको र बेलिब्रिज जडान भदौ ३ गतेदेखि सुरु गरिएको थियो । साविक क्षतिग्रष्त पक्की पुलको फाउन्डेसन नजिकै तल्लो भागमा बेलिब्रिज फाउन्डेसन निर्माण गरेर बेलिब्रिज स्थापना गरिएको हो ।

जामसोमदेखि कोरला नाकासम्मको १ सय १० किमी सडक खण्ड अन्तर्गत घमी खोलाबाहेक अधिकांश स्थानमा पुल निर्माण बनिसकेका छन् । जलवायु परिवर्तनका कारण कागखोलामा आएको भीषण बाढीले बनिसकेको पुल बगाएपछि बर्खा याममा उपल्लो मुस्ताङ जाने सवारी साधनलाई निकै समस्या हुने गरेको थियो ।

कागखोलामा आयोजनाले बेलिब्रिज निर्माण गरिसकेकाले उपल्लो मुस्ताङ आउजाउ गर्ने सवारी साधनलाई सहज भएको लोघेकर दामोदरकुण्ड गाउँपालिका अध्यक्ष लोप्साङ छोम्फेल बिष्टले उल्लेख गरे । ‘यहाँको कागखोलामा बेलिब्रिज जडान भएको छ, अब घमी खोलाको पुल पनि सम्पन्न गर्नेतर्फ जोड दिनुपर्छ’, अध्यक्ष बिष्टले भने, ‘घमीखोलामा पुल बनेपछि कोरला नाकासम्मै बर्खा याममा कुनै समस्या हुँदैन ।’